Ռուսաստանի նախագահ Վլադիմիր Պուտինն այսօր հայտնել է, որ մասնակի մոբիլիզացիա է իրականացվելու, որը մեկնարկելու է սեպտեմբերի 21-ից։ «Ռուսաստանի պաշտպանության, նրա ինքնիշխանության և ամբողջականության պաշտպանության համար անհրաժեշտ եմ համարում աջակցել մասնակի մոբիլիզացման առաջարկը», – ասել է Պուտինը։
Մյուս կողմից, Ռուսաստանի պետական դուման ՌԴ քաղաքացիության ստանալու գործընթացը պարզեցնելու մասին օրենք է ընդունել: Ըստ դրա, այն օտարերկրացիները, որոնք Ռուսաստանի զինված ուժերում ծառայելու մեկ տարվա պայմանագիր կնքեն, կարող են քաղաքացիություն ստանալ առանց երկարատև ձգձգումների և այլ բյուրոկրատական խոչընդոտների:
Այս առնչությամբ, «Հայկական կարիտաս» ՀԿ միգրացիոն ծրագրի փորձագետ Տաթևիկ Բեժանյանը «Առաջին լրատվական»-ի հետ զրույցում նշեց, որ խոսքը 300 հազար մարդու մոբիլիզացիայի մասին է, սակայն մեր միգրանտներին դա այնքան էլ չի վերաբերում. «Ավելի վտանգավոր է այն, որ ուզում են այն միգրանտներին, որոնք պատրաստ են գնալ, կռվել, քաղաքացիություն տան հեշտացված կարգով: Ես կարծում եմ՝ ո՞վ է գլխից ձեռք քաշել, որ հանուն ինչ-որ քաղաքացիության կյանքդ զոհես: Կյանքդ տաս, որ քաղաքացիություն ձեռք բերես, հիմարություն է»,-ասաց նա՝ հավելելով, որ արդեն տեղեկություններ են հասնում, որ Ռուսաստանում մոբիլիազացիայի այդ որոշման դեմ բողոքի ակցիաներ են սկսվում:
Նույն խնդրին անդրադարձավ նաև Ռուսաստանցի հայ փաստաբան հայ-ռուսական իրավաբանների «ԱրմՌոսս» ասոցիացիայի նախագահ Ռուբեն Կիրակոսյանը, ով «Առաջին լրատվական»-ի հետ զրույցում նշեց. «Մոբիլիզացիայի դեպքում ազգությունը կապ չունի, կապ ունի տվյալ անձի ՌԴ քաղաքացի լինել-չլինելը: Մոբիլիզացիան կարող է տարածվել միայն ՌԴ քաղաքացիների վրա, որոնք կարող են լինել տարբեր ազգերի ներկայացուցիչներ, այդ թվում հայեր, որոնք կանգնած են հաշվառման: Ուղղակի այնտեղ կան պահանջներ, թե ինչ փորձի, ինչ տարիքի, ինչ կենսագրության անձինք կարող են զորակոչվել: Դա տարածվում է փորձառու անձանց վրա, ուսանողներին չեն զորակոչում, զորակոչելու են միջին սերնդի մարդկանց, որոնք ունեն ռազմական որևէ մասնագիտություն, նախկինում ծառայել են: Եվ կա տարիքային սահմանափակում՝ մինչև 50 տարեկան: Ընդ որում, կարևոր է, թե դու ինչ կոչում ունես. շարքայինի համար զորակոչման մի տարիք է, իսկ սպաների համար ավելի բարձր տարիք է»:
Ինչ վերաբերում է բանակ՝ ՌԴ քաղաքացիության դիմաց սկզբունքի կիրառմանը, Ռուբեն Կիրակոսյանն ասաց, որ դա վերաբերում է այն միգրանտներին, որոնք դիմել են ՌԴ քաղաքացիություն ստանալու համար, և դա կամավոր որոշում է, այնպես չէ, որ պարտադրում են. «2 օր առաջվա որոշում է, այս պահին վիճակագրություն չկա, թե հայերից քանիսն են դիմել նման հնարավորությունից օգտվելու համար: Կարծում եմ՝ կլինեն անձինք, որոնք կօգտվեն:
Մեր հայրենակիցներից շատերն ունեն նաև ՀՀ քաղաքացիություն: Ընդհանրապես, եթե անձը որևէ երկրի քաղաքացի է և արդեն ծառայել է բանակում, երկրորդ քաղաքացիության դեպքում չեն կարող նրան նորից զորակոչել»:
Փաստաբանի խոսքով, այս պահին Ռուսաստանում խուճապային տրամադրություններ չկան. «Դեռ նոր է, շատ բաներ պարզ չի, հարցականները շատ են: Եթե լինի խուճապային տրամադրություն, դա Հայաստանում կզգացվի, քանի որ կլինի արտահոսք դեպի Հայաստան: Հուսով եմ՝ այս ամենը շատ արագ կավարտվի, սա ժամանակավոր երևույթ է: պատերազմը ոչ մեկի մոտ էլ հաճելի տրամադրություն չի ստեղծում, բոլորն էլ ուզում են, որ այն շուտ ավարտվի»:
Նշենք, որ արդեն իսկ կան տեղեկություններ, որ ՌԴ-ում մոբիլիզացիա հայտարարելու հետո Մոսկվայից Երևան, Ստամբուլ և Բաքու մոտակա չվերթների բոլոր տոմսերը սպառվել են:
