«Առաջին լրատվական»-ի զրուցակիցն է ուկրաինահայ վերլուծաբան Մարատ Հակոբյանը։
-Պարոն Հակոբյան, Ռուսաստանի նախագահ ․Վլադիմիր Պուտինը հայտարարեց մասնակից զորահավաքի մասին Ուկրաինայի դեմ պատերազմին մասնակցելու համար։ Որոշվել է զորակոչել 300 հազար պահեստազորայինի։ Այս որոշման վերաբերյալ ի՞նչ դիտարկումներ ունեք։
-Մենք բոլորս ականատես ենք ռուսական ռեժիմի դարակազմիկ փլուզմանը։ Փաստորեն, Կրեմլն ընդունեց իր պարտությունը և ստորագրեց իր գիշատիչ հավակնությունների ձախողման մասին։ Սա ժամանակակից ռուսական քվազիկայսրության լիակատար պարտության եզրափակիչ փուլի սկիզբն է։ Կրեմլի որոշումը միայն արագացնում է սեփական ռեժիմի վերջը, որը հիմք է ստեղծում ոչ միայն ռազմական աղետալի պարտության, այլև պետության փլուզման համար:
-Հնարավո՞ր է Լուգանսկը հայտարարեն ՌԴ մաս, ասեն, որ մարտերն արդեն իրենց տարածքում են ու դաշնակիցներին կկանչեն օգնության։ Կարո՞ղ ենք չգնալ, Հայաստանն ունի՞ այդ ռեսուրսը։
-Նրանք փետրվարի 24-ին արդեն կիրառեցին այս սցենարը, բայց այս լեգենդը չաշխատեց։ Ուկրաինան ազատագրում է իր տարածքները բոլոր ուղղություններով, հարվածներ է հասցնում օկուպանտների հենակետերին՝ լինի դա Ղրիմում, թե Դոնեցկում։ Ինչ վերաբերում է «դաշնակիցների» գրավչությանը, ապա այստեղ «դաշնակից» բառը բացարձակապես ձևական է, և, ըստ էության, ագրեսոր Ռուսաստանը դրա համար հիմքեր չունի։ Կա համաշխարհային հանրության դիրքորոշումը Ուկրաինայի ինքնիշխանության և տարածքային ամբողջականության վերաբերյալ, և Ռուսաստանն այն վիճակում չէ, որ պարտադրի իր կամքը։
-Վերջին շրջանի ՀՀ պետական մակարդակով դժգոհություններին, Ռուսաստանը՝ Պուտինի մակարդակով փորձում է հաճոյախոսություններով շտկել։ Արդյոք Հայաստանը պետք է ավելի հեռուն գնա ու դուրս գա ՀԱՊԿ-ից՝ չնայելով Ռուսաստանից եկող փաղաքշական ազդակներին։
-Ես կարծում եմ, որ ժամանակին Հայաստանը մտել է ՀԱՊԿ՝ անվտանգության հարցեր լուծելու, զենք ձեռք բերելու և այլն։ Հիմա բոլորս ականատես ենք դարձել, որ ոչ ՀԱՊԿ-ը, ոչ էլ Ռուսաստանի Դաշնությունը, որոնց հետ կան առանձին պայմանագրեր, չեն կատարում իրենց պայմանագրային պարտավորությունները։ Հայաստանի ղեկավարությունը չի կարող վտանգել իր բնակչության կյանքը, անհրաժեշտ է դուրս գալ ՀԱՊԿ-ից, որպեսզի լուծվեն հրատապ խնդիրները՝ զենքի գնում, անվտանգության նոր հայեցակարգի կառուցում և ինքնիշխանության պահպանում։ ՀԱՊԿ-ից դուրս չգալը սպառնում է նոր ցեղասպանությամբ։