Սեպտեմբերի սկզբին «Արարատ-73»-ի լեգենդար պաշտպան Ալեքսանդր Կովալենկոյի թոռը՝ Սամարայի «Կռիլյա Սովետովի» 19-ամյա կիսապաշտպան Ալեքսանդր Կովալենկո կրտսերը, հրավիրվել էր Հայաստանի ազգային հավաքական։ Այս մասին գրել էր ՌԻԱ Նովոստին` հղում անելով Հայաստանի ֆուտբոլի ֆեդերացիայի մամուլի ծառայությանը։ Հիշեցնենք, որ մեր ազգային թիմը սեպտեմբերին 24-ին Ազգերի լիգայի խաղարկության B դիվիզիոնի շրջանակներում Երևանում հյուրընկալելու է Ուկրաինային, իսկ 3 օր անց Դուբլինում խաղալու է Իռլանդիայի հետ։ Նշենք, որ Կովալենկոյի մայրը հայ է, հայրը` կիսով չափ հայ, կիսով չափ ռուս, ոստի այս ֆուտբոլիստը առանց որևէ խնդրի կարող էր կրել Հայաստանի հավաքականի մարզաշապիկը։ Նախօրեին Հայաստանի ազգային հավաքականի գլխավոր մարզիչ Խոակին Կապառոսը հրապարակեց ազգային թիմ հրավիրված ֆուտբոլիստների ցուցակը, որում Կովալենկոյի անունը բացակայում էր։
Հայաստանի հավաքականից ստացած հրավերից հետո, Կովալենկոն հրավիրվել էր համաշխարհային ֆուտբոլի լուսանցքում հայտնված Ռուսաստանի ազգային թիմ։ Ավելի ստույգ հայ ֆուտբոլիստը տեղ էր գտել Ռուսաստանի հավաքականի գլխավոր մարզիչ Վալերի Կարպինի ընդլայնված ցուցակում։ Հիշեցնենք, որ Ռուսաստանի հավաքականը սեպտեմբերի 24-ին Բիշքեկում ընկերական հանդիպում է անցկացնելու Ղրղզստանի հետ։Հանդիպում, որը չի լինելու ՖԻՖԱ-ի հովանու ներքո։ Ուկրաինայի նկատմամբ ցուցաբերած ռազմական ագրեսիայի հետևանքով Ռուսաստանի բոլոր հավաքականներն ու թիմերը զրկված են ՖԻՖԱ-ի և ՈւԵՖԱ-ի հովանու ներքո անցկացվող մրցաշարերին մասնակցելու իրավունքից։ Հավանականությունը մեծ է, որ առնվազն 5 տարի այս պետության հավաքականներին չենք տեսնի միջազգային պաշտոնական մրցաշարերում։ Նախօրեին հայտնի դարձավ, որ Կովալենկոն տեղ է գտել առաջիկա ընկերական հանդիպման վերջնական ցուցակում։ Կարպինի ցուցակում հայտնվելը կարելի է համարել ոչ այնքան տրամաբանական։ Նախ, Կովալենկոն ոչ մի հանդիպում չի անցկացրել Ռուսաստանի երիտասարդական հավաքականում։ Օբյեկտիվորեն, նրա խաղային որակները դեռևս չեն համապատասխանում Ռուսաստանի գլխավոր թիմին։ Կովալենկոյի տրանսֆերային արժեքը ընդամենը կես միլիոն եվրո է։ Մինչ դեռ Ռուսաստանի ազգային հավաքականի ֆուտբոլիստների տրանսֆերային հանրագումարը 140 միլիոն եվրո է։ Ռուսաստանի ազգային թիմում չկա մեկ միլիոն եվրոյից պակաս տրանսֆերային արժեք ունեցող գեթ մեկ ֆուտբոլիստ։ Իսկ ինչու է Կովալենկոն հայտվել Ռուսաստանի ազգային թիմում։ Արդեն նշել էին, որ «Առաջին լրատվական»-ի հավաստի տեղեկության համաձայն Ռուսաստանի ֆուտբոլի միության նախագահ Ալեքասանդր Դյուկովը, որը նաև «Գազպրոմ»-ի գլխավոր տնօրենն է հրահանգել է ճնշել Ռուսաստանում հանդես եկող հայազգի ֆուտբոլիստներին, որոնք նույնիսկ տեսականորեն կարող են հայտնվել Հայաստանի ազգային հավաքականում։
Նման հրահանգ տրվել է այն բանից հետո, երբ Սպերցյանը հայտնվելով Հայաստանի ազգային հավաքականում մեծ վերելք ապրեց և այսօր Ռուսաստանի առաջնության լավագույն ֆուտբոլիստներից է։ Ավելի վաղ մամուլը գրել էր, որ Սամարայի «Կռիլյա Սովետովի» 19-ամյա կիսապաշտպանը ՀՀ հավաքականի կազմում հանդես գալու համար մտածում է Հայաստանի քաղաքացիություն ստանալու մասին։ «Հրավերի մասին իմացել եմ համացանցից, ինչպես բոլորը։ Տեսա ընդլայնված ցուցակն ու իմ նկարն այնտեղ։ Բայց այն նախնական է, այնպես որ դեռ հանգիստ եմ դրան վերաբերվում։ Իհարկե, հաճելի է, որ Վալերի Գեորգիևիչը և ազգային թիմի մարզչական շտաբն ինձ վրա ուշադրություն են դարձրել։ Ուրախացնող է, որ «Կռիլյա Սովետովից» միայն ես չեմ այդ ցուցակում։ Բոլոր ջանքերս կգործադրեմ, որ ամրապնդվեմ հավաքականի հիմնական կազմում։Իհարկե, ինձ համար հետաքրքիր է հայտնվել հավաքականում, խաղալ դրա կազմում։ Կարևոր չէ՝ ինչ խաղ է։ Կարծում եմ՝ հավաքներ պարտադիր պետք է լինեն։ Պետք է նայել երիտասարդ խաղացողներին։ Ինձ առաջարկել են Հայաստանի քաղաքացիություն ստանալ ու հանդես գալ Հայաստանի հավաքականում։ Դիտարկո՞ւմ եմ նաև այդ տարբերակը։ Առանց մեկնաբանությունների»,- հայտարարլ էր Կովալենկոն։
Արձանագրենք, թերևս, որ ընտրելով Ռուսաստանի ազգային հավաքականը՝ Կովալենկոն քար կգցի իր կարիերայի վրա, ինչպես դա արեց մեկ այլ տաղանդավոր հայ ֆուտբոլիստ Արսեն Զախարյանը։ Վերջինս այսօր զրկված է եվրոպական թոփ-ակումբ տեղափոխվելու հնարավորությունից։ Այո Կովալենկոն այս փուլում մերժեց Հայաստանին, բայց նույնիսկ եթե նա մասնակցի Ղրղզստանի դեմ հանդիպմանը, դա չի խանգարի հետագայում կրելու մեր հավաքականի մարզաշապիկը։ Կրկնում ենք, որ հանդիպումն ընկերական է և ՖԻՖԱ-ի հովանու ներքո չէ։
