Ներքին և արտաքին օրհասական մարտահրավերների առաջ ենք: «Առաջին լրատվական»-ի հետ զրույցում նշեց «Հանուն Հանրապետության» կուսակցության նախագահ Արման Բաբաջանյանը:
Անդրադառնալով այսօր Հայաստանի Ազգային անվտանգության խորհրդի հայտարարությանը, Բաբաջանյանը նկատեց. «ԱԽ հայտարարությունը ցույց է տալիս, որ իրավիճակը պայթյունավտանգ է: Հայաստանը ՀԱՊԿ անդամ մնալով` չի կարող դիմակայել Ադրբեջանից եկող սպառնալիքները: Ռուս-թուրքական պայմանավորվածություններ են, որոնց տողատակերը անհասու են Հայաստանին: Ռուս-ադրբեջանական պայմանագիրը համատեղ պլան է ՀՀ պետականության ջախջախման դեմ: Ադրբեջանը ծառայում է որպես գործիք Մոսկվայի ձեռքին: ՀԱՊԿ-ում մեր նախագահության շրջանում Հայաստանի տարածքի նկատմամբ ոտնձգությունը այդ կառույցի կողմից արհամարհվում է»:
Բաբաջանյանը կարծում է, որ Հայաստանը պարտավոր է իր պաշտպանական ու ինքնապաշտպանական կարողությունը զարգացնելու գործուն քայլեր ձեռնարկել. «Փելոսիի հանդիպման հիմնական մեխը անվտանգային կարիքների մասին արձանագրումներն էին: Հայաստանի և ՌԴ-ի միջև մեր անվտանգությունը երաշխավորող պայմանագրերը չեն գործում: ՀԱՊԿ անդամությունը դադարեցնելուն զուգահեռ պետք է հայ-ռուսական պայմանագրերը վերագործարկելու աշխատանքներ տանենք: ՀԱՊԿ-ում մեր անդամությունը դադարեցնելով` պետք է ԱՄՆ մեկնած ձեռքը սեղմել: ԱՄՆ-ն Փելոսիի այցով բարձրացրել է դրոշը` Հայաստանի և ԱՄՆ-ի միջև դաշնակցային հարաբերություններ առաջարկելով»:
