Այն ինչ սկսվեց 2020-ին, մեզ թվում էր Արցախի դեմ է: Մենք միամտորեն 44-օրյա պատերազմը կոչում էինք ղարաբաղյան՝ կարծելով որ պատերազմում պարտվելով, տարածքներ զիջելով, ռուսական խաղաղապահությունը Արցախում հաստատելով ամեն բան կվերջանա և մենք հանգիստ Հայաստանում կբացենք խաղաղության դարաշրջանը:
Միջանցք, Հայաստանի տարածքի նկատմամբ ոտնձգություն, ՊԲ կազմալուծում…
Սրանք նորանոր հարձակումների և պատերազմը շարունակելու փոքր պատրվակներ, գուցե նև նրա համար, որպեսզի մենք վերջնականապես հասկանանք, որ ոչ 44-օրյան էր արցախյան պատերազմ, ոչ էլ Հայաստանի դեմ վերջին հարձակումն էր հերթական էսկալացիա կամ ագրեսիա:
Պատերազմը Հայաստանի դեմ է, Հայաստանի անկախության դեմ է, հայ ժողովրդի դեմ է:
Մինչև մենք սա չհասկանանք, մինչև մենք չհաղթահարենք բոլոր վախերը և իրերն իրենց անուններով չկոչենք ուրեմն մենք կրկնակի մեղսակից կդառնանք նրանում, ինչ դեռ սպասում է Հայաստանին:
Ռուսաստանը այլևս չի հանդուրժում իր սահմանների երկայնքով անկախ պետությունների գոյություն և ամենաթույլ պատառը այս պահին կլանելու ժողովրդավարական Հայաստանն է, որը նա իրագործում է՝ դրսից Ադրբեջանի ձեռքով, ներսից Ռոբերտ Քոչարյանի գլխավորած հինգերորդ շարասյան:
Հայաստանը որոշել է գնալ իր անկախությունը պաշտպանելու ճանապարհով: Առաջիկայում, հուսանք, կգտնվեն արտաքին ագրեսիան կառավարելու կայուն գործիքներ: Ոչ պակաս վտանգավոր է ներքին սպառնալիքը, որը ուտիլիզացնելու, կառավարելու ավելի մեծ գործիքակազմ ունի իշխանությունը:
Րոպե առաջ պետք է անցնել գործի:
Խաղաղություն կլինի, պատերազմ չի լինի, եթե մենք հասկանանք, որ խաղաղության թանկ գինը վճարելու համար պետք է օրնիբուն մտածենք պաշտպանական, ենթակառուցվծքների, էներգետիկ, անվտանգային կարիքներ կուտակել:
Հայաստանը, Հայաստանի անկախությունը հանգիստ չի տալիս արտաքին և ներքին շատ ուժերի: Մեզ պարտադրվում է անապագա և անարժանապատիվ վախճան:
Կամ մենք ազգովի կապիտուլացվում ենք և դառնում ենք անհայրենիք ժողովուրդ՝ մեզ դատապարտելով չգոյության, կամ խելքներս գլուխներս ենք հավաքում, ձեռքներս «քշտում» ենք ու օրնիբուն աշխատում ենք հայրենիքի կարողությունները ասիմետրիկ զարգացնելու համար բոլոր հնարավոր ուղիների մասին:
Սա անում ենք Հայաստանի անկախությամբ, ժողովրդավարությամբ, անվտանգությամբ, հզորությամբ շահագրգիռ բոլոր ուժային կենտրոնների հետ, բնական, իրական դաշնակիցների հետ:
Եւ սա անում ենք միշտ՝ պատերազմ լինի, թե խաղաղություն: