News Georgia-ի փոխանցմամբ՝ Եվրախորհրդարանի նախագահ Եժի Բուզեկը մեկնաբանել է օգոստոսի 26-ին Աբխազիայում արտահերթ նախագահական ընտրությունների անցկացումը.
«Այդ ընտրությունները չեն փոխում Վրաստանից անջատված Աբխազիայի նկատմամբ Եվրախորհրդարանի դիրքորոշումը։ Աբխազիան ինքնավար շրջան է, Վրաստանի մի մասը, և Եվրախորհրդարանն աջակցում է Վրաստանի տարածքային ամբողջականությանն ու ինքնիշխանությանը։
Աբխազիայի՝ որպես ինքնիշխան անկախ պետության գաղափարին միջազգային հանրության կողմից աջակցության բացակայությունը նշանակում է, որ Սուխումի անջատողական քաղաքական գործիչների պահանջներն ունեն թույլ հիմքեր։
Ռուսաստանը դարձյալ չի կատարում 2008 թվականի օգոստոսի 12-ի հրադադարի մասին և սեպտեմբերի 8-ին Աբխազիայի և Հարավային Օսիայի նախահակամարտային դիրքերից սեփական զորքերի դուրս բերման մասին՝ համաձայնագրերով ստանձնած պարտավորությունները։
Միևնույն ժամանակ Եվրախորհրդարանը դրականորեն է վերաբերվում Աբխազիայի և Հարավային Օսիայի հանդեպ Վրաստանի կառավարության որդեգրած ռազմավարությանը։ Դա հատկապես վերաբերում է սոցիալ-տնտեսական տեսանկյունից մարդկային փոխհարաբերություններին։
Եվրախորհրդարանը նաև աջակցում է Վրաստանի և Ռուսաստանի փոխհարաբերությունների վերսկսման գաղափարին։ Աջակցելով տարածաշրջանի ապագային նվիրված ժնևյան միջազգային քննարկումներին՝ Եվրախորհրդարանը նաև աջակցում է Մոսկվայի և Թբիլիսիի միջև պաշտոնական հարաբերությունների վերականգնմանը»։
Հիշեցնենք, որ այս տարվա հունիսի սկզբներին՝ մինչ «Ռուսաստան-ԵՄ» գագաթնաժողովի կայացումը, Եվրախորհրդարանը Եվրոպայի խորհրդին կոչ է արել առաջ քաշել Վրաստանի օկուպացված տարածքներից ռուսական զորքերի դուրսբերման վերաբերյալ Ռուսաստանի ստանձնած պարտականությունների չկատարման հարցը։
Եվրախորհրդարանի ներկայացուցիչները հայտարարել էին, որ քանի դեռ Ռուսաստանը շարունակում է անձնագրեր բաժանել Վրաստանի տարածքում (Աբխազիա և Հարավային Օսիա), իրենք չեն քննարկելու Ռուսաստանի և Եվրոպայի միջև անցագրային ռեժիմի վերացման հարցը։
