Կառավարության Միջազգային իրավական հարցերով գրասենյակը Մարդու իրավունքների եվրոպական դատարան միջանկյալ միջոց կիրառելու պահանջով դիմում է ուղարկելու՝ ընդդեմ Ադրբեջանի ագրեսիայի: Միջազգային իրավական հարցերով գրասենյակի ներկայացուցիչ Եղիշե Կիրակոսյանի մամուլի խոսնակ Հասմիկ Սամվելյանը նշել է, որ առաջիկա ժամերին դիմումը կուղարկվի։ Բացի այդ նամակ են ուղարկելու ՄԱԿ–ի Արդարադատության միջազգային դատարան՝ Ադրբեջանի ագրեսիայի վերաբերյալ:
Այս առնչությամբ, Մարդու իրավունքների եվրոպական դատարանում Ադրբեջանում պահվող հայ ռազմագերիների ու քաղաքացիական անձանց ներկայացուցիչ, իրավաբան Սիրանուշ Սահակյանը «Առաջին լրատվական»-ի հետ զրույցում նշեց. «Կարծում եմ՝ մասնագիտական թիմը ճիշտ է ընտրել միջոցը և նաև վստահ եմ, որ միջանկյալ միջոցի պահանջը լինելու է արգելել, կանխել քաղաքացիական բնակչության թիրախավորումը կամ հարձակումները ՀՀ սուվերեն տարածքի վրա: Ուղղակի պետք է հաշվի առնել, որ ՄԻԵԴ-ն արդեն իսկ կիրառել է միջպետական գանգատի շրջանակում անհապաղ միջոց և արգելել է Ադրբեջանին դիմել ուժի գործադրման և թիրախավորել խաղաղ բնակչությանը: Չնայած նաև ՄԱԿ-ի դատարանն ունի անհապաղ միջոց, որի շրջանակներում պետք է կանխվեր ատելությունը և խտրական վերաբերմունքը: Չնայած այս որոշումներին, Ադրբեջանն ակնհայտ ոտնձգում է միջազգային իրավունքի դեմ և նաև չի կատարում դատական ակտերը, որին որպես կանոն պետք է հաջորդի սուր միջազգային արձագանք՝ ուղեկցվող պատժամիջոցներով կամ առնվազն դրանց կիրառման սպառնալիքներով: Ես ամենամեծ խնդիրը տեսնում եմ դրանում, որ միջազգային հանրությունը պատշաճ չի դատապարտում Ադրբեջանի ագրեսիան, շարունակական հանցագործությունները, էթնիկ բնաջնջման քաղաքականությունը և այլն: Տպավորություն կա, որ այս գործողությունները կատարվում են միջազգային հանրության իմացությամբ և գործակցությամբ»:
Նա նաև հավելել է, որ այդ առումով կարելի է ասել, որ և ՄԻԵԴ-ը, և ՄԱԿ-ը կվերահաստատեն իրենց նախկինում կայացրած դիրքորոշումները, բայց որքանով իրավունքը կսկսի գործել, ինչպիսի դիվանագիտական քաղաքական նախադրյալներ կձևավորվեն իրական գործընկերների աջակցությամբ, որպեսզի ապահովեն իրավունքի գործողությունը, սա այլ հարց և այստեղ շատ քաղաքական գործոններ կան:
Դիտարկմանը, որ ստացվում է, որ ՄԻԵԴ-ը եթե մի անգամ որոշում կայացրել է, երկրորդ անգամ չի՞ կարող կայացնել նմանատիպ որոշում, Սիրանուշ Սահակյանն ասաց. «Առնվազն այդ դեպքերով, երբ Հայաստանը դիմեց, ՄԻԵԴ-ը վկայակոչեց իր նախկինում կատարված որոշումը և ասաց, որ կրկին նույն միջոցը կիրառելու անհրաժեշտություն չկա, որովհետև ի սկզբանե, հայ-ադրբեջանական հարաբերություններում այդպիսի միջոց կիրառված է: Դա պետք է գործեր ինչպես պատերազմական, այնպես էլ հետպատերազմական ժամանակահատվածում ինչպես արցախա-ադրբեջանական սահմանին, այնպես էլ հայ-ադրբեջանական միջադեպերով: Այսինքն մեծ հաշվով ամենալայն ընդգրկում միջոցը կիրառված է դատարանի կողմից և Եվրոպական դատարանը վերահաստատի իր որոշումը, մեծ հաշվով իրերի վիճակը չի փոխվելու, եթե քաղաքական արձագանքի առումով մենք չկարողանանք միջազգային հանրության անտարբերության սառույցը հալեցնել»:
Հարցին, թե որ որքա՞ն արագ կլինեն դատարանի հրատապ գործողությունները, նա պատասխանեց. «Կարծում եմ՝ մինչև եռօրյա ժամկետում մենք արձագանք կունենանք ՄԻԵԴ-ից, բայց չենք կարող ապավինել, որ ռազմական այդ գործողությունները կարող են դադարեցվել ՄԻԵԴ-ի միջամտության շնորհիվ: Այստեղ մենք պետք է լուրջ արձագանք ակնկալենք ՄԱԿ-ի Անվտանգության խորհրդից, ԵՄ-ից, ԱՄՆ-ից, ՀԱՊԿ-ից և այլ կառույցներից, որոնք քաղաքականապես կարող են զսպել միջազգային իրավունքն անտեսող պետությանը»:
