Միջազգային իրավունքի կոպտագույն խախտմամբ Հայաստանի Հանրապետության պետական սահմանի երկայնքով հայկական դիրքերի և խաղաղ բնակավայրերի վրա ձեռնարկված հարձակման հետևանքով ադրբեջանական զինուժը մեծ կորուստներ է կրել:
Որ ըստ ադրբեջանական լրատվամիջոցների՝ սեպտեմբերի 12-ի լույս 13-ի գիշերը սկսված ռազմական գործողությունների հետևանքով ադրբեջանական զինուժից ոչնչացվել է 50 զինծառայող, այդ թվում՝ ադրբեջանական բանակի 42 զինծառայող և պետական սահմանապահ ծառայության 8 զինծառայող:
Ադրբեջանական կողմի հրապարակած պաշտոնական թվերն ակնհայտորեն պակաս են իրական թվերից։ Առավոտյան ՀՀ պաշտպանության նախարարության տարածած տեսանյութում երևում է, թե ինչպես է ադրբեջանական մեծաքանակ զորախումբը հարձակման փորձ անում ու մեծ կորուստներ կրելով` հետ շպրտվում։
Ադրբեջանի զինված ուժերը սեպտեմբերի 12-ի լույս 13-ի գիշերը՝ 00:05-ի սահմաններում, հարձակման են անցել Հայաստանի Հանրապետության պետական սահմանի երկայնքով՝ ռազմական գործողություններ ձեռնարկելով Սյունիքի, Վայոց ձորի և Գեղարքունիքի մարզերի ուղղություններով:
ՀՀ պաշտպանության նախարարությունը հայտնել է, որ հրետակոծման են ենթարկվել Սոթքի, Վարդենիսի, Գորիսի, Կապանի, Արտանիշի և Իշխանասարի ուղղությամբ տեղակայված դիրքերը: Հարվածներ են հասցվում նաև քաղաքացիական ենթակառուցվածքներին: Ինտենսիվ գործողությունները շարունակվել են ողջ գիշեր: Նախնական տվյալներով հայկական կողմն ունի 49 զոհ: ՀՀ ՊՆ մամուլի խոսնակ Արամ Թորոսյանը երեկոյան ճեպազրույցի ընթացքում հայտնել է, որ իրադրությունը հայ-ադրբեջանական սահմանագծի որոշ հատվածներում ժամը 18:00-ի դրությամբ շարունակում է լարված մնալ: Թորոսյանի խոսքով՝ հայկական կողմի կորուստների մասին տվյալները ճշտվում են:
