WikiLeaks-ի հերթական հրապարակման մեջ նշվում է, որ ՀՀ առաջին նախագահ, ընդդիմության առաջնորդ Լևոն Տեր-Պետրոսյանի դեմ իրականացվել է սև PR, որտեղ նրան մեղադրել են իսրայելական և մասոնական դավադրությունների մեջ: Այս քարոզչությունն իրականացվել է հիմնականում պետական լրատվամիջոցների կողմից: 2008 թ. հունիս ամսով թվագրված ամերիկյան դիվանագիտական փաստաթղթում, որը նախապատրաստվել է փոխդեսպան Փենինգթոնի կողմից, նշվում է, որ հակաքարոզչությունը 2008 թ. նախագահական արշավի ժամանակ սկսված գործընթացի շարունակությունն է եղել:
Փաստաթղթում նշվում է, որ տպագիր «Գոլոս Արմենիի» և «Հայոց աշխարհ» լրատվամիջոցներում նման հրապարակումներ եղել են 2008 թ. մայիսին, որոնք, ըստ դեսպանատան աղբյուրների, ֆինանսավորվել են Սերժ Սարգսյանի կողմից: Այդ հրապարակումներում Լևոն Տեր-Պետրոսյանը մեղադրվում էր Արևմուտքի կողմից դավադրություններ կազմակերպելուն մասնակցելու մեջ, իսկ հիմնական թիրախները Իսրայելն ու մասոնականությունն էին: «Լևոն Հակոբի Տեր-Պետրոսյան կամ Լևոն Ֆրայիմ Պլիսկովսկի. Հայ ազգային կոնգրե՞ս, թե՞ Հրեական կոնգրես» հրապարակման մեջ հեղինակը մեղադրել է առաջին նախագահին 2008 թ. արշավը կազմակերպելու համար իսրայելցի գործարարից 100-200 միլիոն դոլար ստանալու մեջ: Իսկ արշավին հրեա-մասոնության ներդրումն էլ եղել է 65-70 միլիոն դոլար:
Փաստաթղթում նշվում է, որ «Եվրատեսիլում» Սիրուշոյին բոյկոտելու գաղափարը, ըստ պետական մամուլի, նույնպես իսրայելական, ջհուդամասոնական դավադրության մի մաս էր, ինչի մասին հատուկ ռեպորտաժ էր ցուցադրել Հանրային հեռուստատեսությունը: