Քրդական Fırat լրատվական գործակալության փոխանցմամբ՝ ԵԱՀԿ-ի պատրաստած «Հյուսիսային Կիպրոսում մշակութային ժառանգության ոչնչացումը և միջազգային իրավունքի ոտնահարումը» խորագրով զեկույցում նշված է, որ Կիպրոս կղզու հյուսիսային հատվածում 1974 թվականից հետո մինչ այժմ տուժել է ավելի քան 500 եկեղեցի։ Խոսքը դրանց կա՛մ ամբողջովին, կա՛մ մասնակի ոչնչացման, կա՛մ էլ եկեղեցիների ներսում գտնվող արժեքավոր իրերի անհետացման մասին է։
Ընդհանուր առմամբ, այդ եկեղեցիներից հանվել են 15,000 սրբապատկերներ և այլ արժեքավոր իրեր, որոնց մի մասը ոչնչացվել է, իսկ մեծ մասն էժան գնով վաճառվել է շուկայում։ 77 եկեղեցիներ վերածվել են մզկիթի, իսկ ևս 28 եկեղեցիներ՝ ռազմական հոսպիտալի։
Հիշեցնենք, որ նախորդ տարվա սեպտեմբերի վերջին էլ ԱՄՆ Կոնգրեսի Ներկայացուցիչների պալատն ընդունել էր «Հարգանք ցուցաբերել թուրքական օկուպացիայի տակ գտնվող կղզու հյուսիսային հատվածի կրոնական արժեքների և կրոնական ազատությունների նկատմամբ» խորագրով թիվ 1631 բանաձևը, որում նշված էր.
«Անհապաղ կյանքի կոչել Կիպրոսի հետ կապված ՄԱԿ-ի Անվտանգության խորհրդի և Եվրոպայի մարդու իրավունքների դատարանի որոշումները, անմիջապես դադարեցնել ավերիչ գործունեությունը կղզու հյուսիսում գտնվող հունական սրբավայրերում, սրբապատկերների և բացառիկ մշակութային արժեքների առևտուրը, ջանքեր գործադրել բոլոր անհետացած արժեքները գտնելու և վերականգնելու ուղղությամբ, հնարավորություն ստեղծել ավերված սրբավայրերի պահպանման կամ վերականգնման համար, վերջ տալ հույների կրոնական ազատությունների դեմ ոտնձգություններին։
Կիպրոսի հյուսիսային հատվածում 80 եկեղեցի վերածվել է մզկիթների, 28 եկեղեցի թուրքական բանակը վերածել է պահեստների և բարաքների, և միայն 6 եկեղեցի է վերածվել թանգարանի»:
Կիպրական խնդիրը շարունակում է չլուծված մնալ 1974 թվականից, երբ Հյուսիսային Կիպրոս ներխուժեցին թուրքական զորքերն ու գրավեցին Կիպրոսի տարածքի 37 տոկոսը (3355 քառակուսի կիլոմետր), ինչը թուրքական կողմն անվանում է «Խաղաղության շարժում»: