Ֆրանսահայ կինոռեժիսորներ Ռոբերտ Գեդիգյանը, Վազգեն Թորանյանը և դերասան Սիմոն Աբգարյանը կոչ են արել հայ համայնքին և իրենց ընկերներին ֆինանսական օգնություն ցուցաբերել Հայաստանին և Արցախին՝ Ֆրանսիայի Հայկական հիմնադրամի նյութատեխնիկական ապահովման մասնակցությամբ: Տեղեկությունը հրապարակել է ԱՄն-ում հրատարկվող Mirror Spectator պարբերականը։
Առաջարկվում է մասնակցել կամավոր, հարկի նվազագույնը չափը 10 եվրո կամ 10 դոլար ամսական նվիրատվություն՝ «նպաստելու Հայաստանի և Ղարաբաղի անվտանգությանը, կայունությանը և զարգացմանն այս անհանգիստ ժամանակներում»:
«Ֆրանսիայի հայկական հիմնադրամը (Fonds Arménien de France) վստահելի և ամուր գործընկեր է: Դրա օրինականությունն ու վստահելիությունն այլևս հարցականի տակ չեն»,- ասված է սփյուռքահայ գործիչների տարածած հայտարարության մեջ: Հեղինակները նաև կոչ են անում «Հայաստան» համահայկական հիմնադրամին շտապ միանալ այս «սրբազան հարկը» հավաքելու աննախադեպ գործողությանը։
Համեստ կանխատեսմամբ՝ 3 միլիոն մարդու ամսական 10 եվրո կամ 10 դոլար հարկի շնորհիվ տարեկան 360 միլիոն դոլար կամ եվրո կհավաքվի Հայաստանին և Արցախին օգնելու համար։
Ֆրանսահայ հասարակական-քաղաքական գործիչ Հիլդա Չոբոյանն այս նախաձեռնությանը դրական է վերաբերում, սակայն միևնույն ժամանակ նշում է, որ նման նախաձեռնություններ Ֆրանսիայում շատ են եղել․ «Ըստ իս՝ Ֆրանսիայում սա մեծ արձագանք չի ստացել, որովհետև այդպիսի նախաձեռնություններ շատ են եղել։ Շատ լավ է, որ իրենք այդպիսի նախաձեռնությամբ են հանդես եկել, բայց չեմ էլ կարծում, թե հատուկ ուշադրության է արժանի։ Եթե շատ ընդհանրական նպատակներ են հետապնդվում, չեմ կարծում, թե դա շատ մեծ արձագանք կստանա»,-«Առաջին լրատվական»-ի հետ զրույցում ասաց նա։
Մեր զրուցակցի կարծիքով՝ Ֆրանսիայում կա մտահոգություն և զգացվում է գործնական լուծումների ու նախաձեռնությունների պակաս․ «Իհարկե չենք կարող ֆրանսահայության մասին միանշանակ խոսել, բայց ընդհանրապես հուսախաբ ու հուսահատ հոգեվիճակ կա մարդկանց, տարբեր անհատների մոտ։ Թունելի ծայրում լույս չի տեսնվում, ընդհանուր իրավիճակը սա է։ Սպասվում է, որ Հայաստանից ու Արցախից կարևոր նախաձեռնություններ լինեն, ակնկալիքները դա են»։
Ինչ վերաբերում է Արցախի հանդեպ Ֆրանսիայի իշխանությունների հետաքրքրություններին, ապա Հիլդա Չոբոյանի խոսքերով՝ Ֆրանսիայում նախագահական ընտրությունների ավարտից հետո այդ հետաքրքրությունը նվազել է․ «Ֆրանսիայում կան այլ առաջնահերթ խնդիրներ։ Ինչպես միշտ, երբ առաջնահերթ ու օրհասական լուծվելիք խնդիրներ ու մտահոգություններ կան, ապա Արցախն առաջին տեղում չէ։ Ընտրությունները վերջացան, երկրում կան տնտեսական խնդիրներ և այս առումով ես տեսնում եմ Արցախի ու Հայաստանի նկատմամբ հետաքրքրության նվազում»,-եզրափակեց նա։