ԵԱՀԿ Մինսկի խմբի ամերիկացի համանախագահ Ֆիլիպ Ռիքերը, որի նշանակումը մեծ ուշադրության արժանացավ Կովկասում, պատրաստվում է այցելել Հայաստան, Վրաստան ու Ադրբեջան: Հիշեցնենք, որ Ֆիլիպ Ռիքերի այսպես ասած հիմնական պաշտոն ներկայացվում է Կովկասի հարցերի գլխավոր բանակցողի կարգավիճակը, որի «իրավասության» շրջանակում լոկ հայ-ադրբեջանական հակամարտությունը չէ, այլ նաև Վրաստանին առնչվող հարցեր: Այդուհանդերձ, ԱՄՆ պետքարտուղարի՝ Եվրոպայի ու Եվրասիայի հարցերի նախկին օգնականի այցը հայաստանյան դիտակետիից բնականաբար հետաքրքրություն ներկայացնում է Մինսկի խմբի համանախագահի «ենթակարգավիճակի» առումով:
Ռիքերը այցելում է ճանաչողակա՞ն, թե՞ կոնկրետ առաջարկ պարունակող բովանդակությամբ: Նա որոշակի ժամանակ պաշտոնավարելով իբրև պետքարտուղարի օգնական, թերևս ծանոթ է ռեգիոնին և այստեղ եղած խնդիրներին: Իր պաշտոնում Ռիքերը շփումներ է ունեցել Հայաստանի ու Ադրբեջանի արտգործնախարարների, այլ դիվանագետների հետ: Ավելին, 2021 թվականի հունիսին ԱՄՆ պետքարտուղարի Եվրոպայի ու Եվրասիայի հարցերի տեղակալի պաշտոնակատար Ֆիլիպ Ռիքերը այցելել է Կովկաս՝ Հայաստան, Վրաստան և Ադրբեջան, հանդիպել քաղաքական ղեկավարների հետ: Այդպիսով, ամերիկացի պաշտոնյան հազիվ թե ունի Կովկասին ծանոթանալու կամ Կովկասը ճանաչելու էական խնդիր, հետևաբար առավել հավանական է, որ նրա այցը կարող է պարունակել իր նոր կարգավիճակում գործունեության առարկայական բովանդակային ուղենիշներ, որոնք նա ներկայացնելու է Կովկասի երկրների ղեկավարներին: Կենթադրի՞ այդ ամենը նաև անմիջական առաջարկներ կոնկրետ խնդիրների, մասնավորապես այդ առումով նաև հայ-ադրբբեջանական հակամարտության, արցախյան հարցի հեռանկարի իմաստով, բարդ է ասել:
Այն, որ ԱՄՆ-ն ունի կոնկրետ առաջարկ և եվ ներկայացրել է կողմերին, պարզ դարձավ հուլիսի 5-ին՝ ԱՄՆ պետքարտուղարի Երևան և Բաքու հեռախոսազրույցներից հետո: Հայաստանում ԱՄՆ դեսպանը մանրամասնեց, որ խոսքը հաղորդուղիների ապաշրջափակման հարցում տեխնիկական աջակցության պատրաստակամության մասին է: Մանրամասներ սակայն չեն հնչել Ֆիլիպ Ռիքերը բերու՞մ է դրանք, թե՞ գալիս է դրանց շուրջ կողմերի մոտեցումները լսելու և քննարկելու: