Ռուսաստանի Դաշնության արտաքին գործերի նախարարության պաշտոնական ներկայացուցիչ Մարիա Զախարովան ընդգծել է Ադրբեջանի և Եվրասիական տնտեսական միության (ԵԱՏՄ) համագործակցության բարձր ներուժը: Մամուլի ասուլիսի ժամանակ Զախարովան դրական է գնահատել Ադրբեջանի վարչապետ Ալի Ասադովի մասնակցությունն օրերս Չոլպոն-Աթայում կայացած ԵԱՏՄ միջկառավարական խորհրդի նիստին:
Մարիա Զախարովայի կարծիքով` Ադրբեջանի և ԵԱՏՄ-ի միջև երկխոսության զարգացումը զգալի ազդեցություն կունենար ողջ տարածաշրջանի համար և օգտակար կլիներ Բաքվի և Երեւանի միջև հարաբերությունների կարգավորման համար:
«ԵԱՏՄ-ի հետ Բաքվի համագործակցության ներուժը, մեր կարծիքով, շատ բարձր է: Մենք նման կոոպերացիայի մեծ հեռանկարներ ենք տեսնում: Կարծում ենք, որ դա օգտակար կլինի Հայաստանի և Ադրբեջանի միջ7 հարաբերությունների կարգավորման համար», – հայտարարել է Զախարովան:
Ադրբեջանի վարչապետ Ալի Ասադովը Ղրղզստանի վարչապետ Ակիլբեկ Ժապարովի հրավերով որպես հյուր մասնակցել է Եվրասիական միջկառավարական խորհրդի նիստին, որը տեղի է ունեցել օգոստոսի 25-26-ը Ղրղզստանի Չոլպոն-Աթա քաղաքում:
Քաղաքագետ Անդրիաս Ղուկասյանի կարծիքով՝ ի սկզբանե Ռուսաստանի Դաշնության ռազմավարությունը Հարավային Կովկասում ենթադրում էր օգտագործել արցախյան խնդիրը Հայաստանն ու Ադրբեջանն իր քաղաքական, տնտեսական, ռազմական ազդեցության տիրույթում պահելու համար․ «Հիմա, երբ արևմուտքն Ադրբեջանից պահանջում է հրաժարվել 44-օրյա պատերազմի ժամանակ ուժի ճանապարհով ձեռք բերված արդյունքներից ու գնալ խաղաղ կարգավորման հիմնարար սկզբունքների ճանապարհով՝ այն է, դուրս բերել զորքերը Արցախից, համաձայնել, որ միջազգային բազմազգ խաղաղարար ուժեր այնտեղ տեղակայվեն, համաձայնվեն, որ կարգավիճակը որոշվի հանրաքվեի միջոցով․․․ այս իրավիճակը Ռուսաստանը փորձում է օգտագործել իր օգտին՝ առաջարկելով Ադրբեջանին ալտերնատիվ»,-«Առաջին լրատվական»-ի հետ զրույցում ասաց նա։
Ըստ Ղուկասյանի՝ ալտերանտիվը ռուսների կարծիքով կայանում է նրանում, որ Ադրբեջանը պետք է հրաժարվի Եվրամիության հետ իր հարաբերություններից ու փորձի կառուցել հարաբերությունները Եվրասիական տնտեսական միության հետ․ «Սա է իրողությունը, և այդ քաղաքականությանը Ռուսաստանն այսօր չի հանգել։ Նման փորձեր Ռուսաստանը միշտ արել է՝ օգտագործելով այն հանգամանքը, որ Ադրբեջանի ցանկություններն Արցախի հետ կապված արևուտքում բավարարվել չեն կարող։Ինքն այստեղ հանդես է գալիս ալտերնատիվ առաջարկով և մեծ հաշվով դա, ինչպես ես նախկինում ասել եմ՝ ընդամենը մի քայլ է դեպի միութենական պետություն»։
Եթե կտրուկ դրվի Ադրբեջանի՝ ԵԱՏՄ անդամակցության հարցը, Հայաստանը քաղաքագետի խոսքերով, առարկելու մեծ հնարավորություններ չունի․ «Ես չեմ կարծում, որ Հայաստանն ու Հայաստանի այսօրվա ղեկավարությունը ինքնուրույն որոշում կայացնելու իրավասություն կամ հնարավորություն ունեն։ Հայաստանի ղեկավարությունը կանի այնպես, ինչպես որ կորոշվի Ռուսաստանի Դաշնության հետ միասին։ Ես բացառում եմ իրավիճակ, երբ Ռուսաստանի Դաշնությունը համարի, որ հարկավոր է Ադրբեջանի անդամակցությունը ԵԱՏՄ-ին, իսկ Հայաստանի ղեկավարությունն ու Նիկոլ Փաշինյանը դրա դեմ դուրս գան կամ համարեն, որ ոչ, ինչ-որ պայմաններ դնեն։ Ենթադրել, որ Հայաստանի այսօրվա իշխանությունները ինչ-որ քայլ կանեն՝ խաբկանք է»։
Ինչ վերաբերում է այն հարցին, թե արդյոք Ադրբեջանին այս փուլում պետք է ԵԱՏՄ-ին անդամակցությունը, մեր զրուցակիցն ասաց․ «Ադրբեջանը կանգնած է այդ ընտրության առաջ՝ ունենալ հարաբերություններ Եվրամիության հետ, բայց ընդունել Արցախի ինքնորոշման իրավունքը կամ խզել հարաբերությունները Եվրամիության հետ, դուրս գալ Եվրոպայի խորհրդից, Մինսկի խմբից ու հույս դնել, որ ԵԱՏՄ կամ ապագա Միութենական պետության շրջանակներում հնարավոր կլինի հաջողության հասնել։ Այդ դեպքում շատ հնարավոր է, որ ինչպես Սերժ Սարգսյանը սեպտեմբերի 3-ին Եվրամիությանը անակնկալ մատուցեց, այնպես էլ մինչև նոյեմբեր ընկած ժամանակահատվածում Իլհամ Ալիևը նման քայլ կանի ու կկանգնացնի Եվրամիությանը փաստի առաջ՝ ներկայացնելով, որ ամուր իշխանություն պահելը հնարավոր չի համարում Եվրամիության հետ հարաբերություններում»,-եզրափակեց նա։
