«Թբիլիսոբա-2022» տոնն այս տարի կկայանա հոկտեմբերի առաջին հանգստյան օրերին՝ ամսի 1-ին եւ 2-ին: Այդ մասին, հայտարարել է Թբիլիսիի քաղաքագլուխ Կախա Կալաձեն:
Նրա խոսքով՝ ավանդական տոնը, որը վերջին տարիներին չի անցկացվել համավարակի պատճառով, այս տարի լինելու է հատկապես ընդգրկուն:
«Այս տոնը, որը մեր քաղաքի բազմամյա ավանդույթն Է եւ նրա կյանքի մի մասը, այս տարի կրկին կկայանա… «Թբիլիսոբա»-ն լինելու Է անհամեմատ ավելի ընդգրկուն եւ բազմաթիվ տոնական ծրագրերով լի»,-Կալաձեն ասել Է մայրաքաղաքի կառավարության նիստում: Նրա խոսքով՝ «Թբիլիսոբա»-ն ավանդաբար կընդունեն Թբիլիսիի «Ռիկե» քաղաքային պարկը եւ Լեգվտախեվին (ջրվեժ): Նաեւ միջոցառումներ տեղի կունենան Օրբելիանիի եւ Գուդիաշվիլիի հրապարակներում:
«Մենք պատվիրակությունների ենք սպասում բարեկամ եւ գործընկեր քաղաքներից: Բոլորն անհամբերությամբ են սպասում այդ տոնին»,-հավելել Է Կալաձեն, նշելով, որ միջոցառումների ծրագրի մասին մանրամասն տեղեկատվությունը հայտնի կդառնա ավելի ուշ:
«Թբիլիսոբա»-ն ամենասիրելի ավանդական տոներից մեկն Է Վրաստանում: Սովորաբար այդ օրը միշտ հագեցած Է տարբեր ժամանցային միջոցառումներով, վառ հանդիսախաղային փառատոներով: Այդ օրը մայրաքաղաք են ժամանում ֆերմերները՝ իրենց շրջաններից, վաճառասեղանները կոտրվում են թարմ բանջարեղենի ու մրգերի, քաղցրավենիքի, պանրի առատությունից: Ժողովրդական զբոսախնջույքները տեւում են մինչեւ ուշ երեկո եւ ավարտվում գալա-համերգով ու հսկայական հրավառությամբ:
«Թբիլիսոբա»-ն մայրաքաղաքում տոնում են 1979 թվականից: Այդ տոնը չեն նշել միայն Թբիլիսիի եւ ընդհանուր առմամբ երկրի համար ամենածանր ժամանակ՝ 1989-ից մինչեւ 1994 թվականները: Սակայն հետո տոնակատարության ավանդույթը վերսկսվել Է: 2018 թվականից որոշում Է ընդունվել, որ տոնն ամեն տարի անցկացվի հոկտեմբերի առաջին հանգստյան օրերին, հաղորդել Է Sputnik-ը: