Ռուսական տելեգրամ ալիքները հայտնում են, որ Ռուսաստանում մոբիլիզացիան սարերի հետևում չէ։ Որքան էլ իշխանությունը փորձում է հերքել, բայց արդեն տարբեր ալիքներ գրում են, որ հատկապես շրջաններում, արդեն այն սկսվել է, քանի որ Ռուսաստանում լուրջ ռազմակադրային ճգնաժամ է սկսվում, իսկ կամավորներին դժվարությամբ են գտնում։ Ռուսաստանի հայ համայնքում ինչ տրամադրություններ են՝ պատրաստվո՞ւմ են մեկնել ռազմաճակատ, թե ոչ։
Այս առնչությամբ «Առաջին լրատվական»-ի հետ զրույցում «Russia-armenia.info» լրատվական կայքի խմբագիր, Հայ-ռուսական կազմակերպությունների համակարգող խորհրդի համանախագահ Արամ Խաչատրյանը նշեց. «Ես ինքս զինվորական եմ, և այս պահի դրությամբ ոչ մի փոփոխություն չեմ զգում, ինձ ոչ մեկը չի հրավիրում զինկոմիսարիատ, չկա նման բան: Եթե զինկամիսարիատները սկսեն մոբիլիզացիա, կապ չունի՝ դու հայ ես, թե ռուս, եթե դու ՌԴ քաղաքացի ես, հաշվառման կանգնած ես, եթե պետք ես, քեզ կարող են կանչել: Այս պահին ամեն ինչ հանգիստ է, ոչինչ չկա»,-ասաց նա:
Արամ Խաչատրյանը տեղեկացրեց, որ եթե առաջ կար սահմանափակում մինչև 55 տարեկանը, ապա հիմա այդ սահմանափակումը հանել են. «Հիմա ես 55 տարեկան եմ և սպա եմ, ու դեռ ինձ չեն կանչել: Եթե կանչեն, առաջինը սպաներին կկանչեն: Դրա համար եմ ասում, որ ոչինչ չկա: Դա կեղծ լրատվական տեղեկություններ են: Գուցե որոշ մարզերում նման բաներ գնում են, բայց այստեղ չկա: Գուցե այն բնակավայրերում, որտեղ հայերը շատ են, հնարավոր է հայերից էլ շատ գնացողներ են եղել, բայց Մոսկվայում նման բան չկա: Մոսկվայում մարդկանց համար պատերազմը հեռու-հեռու ինչ-որ տեղ է: Պատերազմը այստեղ ընդհանրապես չի զգացվում: Մարդիկ սովորականի պես աշխատում են, ապրում են, կյանքն իր հունով գնում է, դոլարի կուրսն իջել է, խանութներում ամեն ինչ կա: Երբ պատերազմը նոր էր սկսվել, բրինձը, հնդկաձավարը կորան, հիմա ամեն ինչ կա: Շաքարը, որ թանկացել էր, իջել է առաջվա գնին»,-ասաց նա:
Թե ՌԴ հայերից քանիսն են մասնակցել կամ մասնակցում պատերազմին, Խաչատրյանը նեց, որ թիվ չի կարող ասել, բայց կարող է ասել, որ Դոնբասում առաջին հերոսներից մեկը հայ փոխգնդապետ Անդրանիկ Գասպարյանն է:
Ենթադրվում է, որ եթե հայերը Ռուսաստանի բնակչության 2 տոկոսն են կազմում, ապա բանակի 2 տոկոսը հայ պետք է լինեն:
Այդուհանդերձ, եթե մոբիլիզացիա իրականացվի, հայերը ակտիվություն կցուցաբերե՞ն, Արամ Խաչատրյանը պատասխանեց. «Հայերն այս պատերազմում ակտիվություն ցուցաբերեցին: Ռուսաստանի հայերի միությունը, էլի շատ հայկական կազմակերպություններ ելույթներ ունեցան Ռուսաստանի օգտին: Մարտին Ռուսաստանում հայ գեներալների և սպաների հավաք տեղի ունեցավ, որոնք ևս աջակցեցին Պուտինին պատերազմի հարցում: Գեներալ-լեյտենանտ Նորատ Տեր-Գրիգորյանցն էր, գեներալ-մայոր Ռոման Արուտյունովն էր, էլի շատ գեներալներ, ավագ սպաներ: Այդ ժամանակ Արա Աբրահամյանը հայտարարեց, որ 16-17 վագոն օգնություն է ուղարկում Դոնբաս: Մենք Դոնբասում մեծ թվով հայ ենք ունեցել: Հայ համայնքի մեծամասնությունը Պուտինին աջակցում է»:
Խաչատրյանը նշեց նաև, որ ուկրաինացիները միշտ աչքի են ընկել հակահայկական տրամադրություններով, ավելին՝ բազմիցս աջակցել են Ադրբեջանին, և հիմա չպետք է քննադատեն Ռուսաստանում ապրող հայերին ՌԴ քաղաքականությունը կիսելու համար:
