ԱՄՆ պետքարտուղար Էնթոնի Բլինկենի հրամանով դիվանագետ, Պետդեպի երկարամյա աշխատակից Ֆիլիպ Ռիքերը նշանակվել է ԵԱՀԿ Մինսկի խմբի համանախագահ և Կովկասի հարցերով ավագ խորհրդական: Այս մասին ասվում է Բլինքենի հայտարարությունում: Թեմայի շուրջ «Առաջին լրատվական»-ը զրուցել է ազգագրագետ, «Օրբելի» վերլուծական կենտրոնի փորձագետ Արտակ Խաչատրյանի հետ:
Նրա խոսքով՝ Ռիկերին վստահվել է բավականին կարևոր ու պատասխանատու աշխատանք․ «Հավաքական արևմուտքը վերաթարմացնում է հետաքրքրությունները տարածաշրջանում»: Սակայն փորձագետը կարծում է, որ պետք է դադարել հույսեր փայփայել Մինսկի խմբի հետ կապված․ «Ռիկերի նշանակումը Մինսկի խմբին լրացնող հավելյալ գործիք է»: Անդրադառնալով հայ-ռուսական հարաբերություններին և հարցին, թե որքան են այսօր այդ հարաբերությունները անկեղծ, փորձագետը նկատեց․ «Ռուսաստանը չի ընկալվել տարածք, որը մեզ անծանոթ է․ հարաբերությունները եղել են իներցիոն: Հայ-ռուսական հարաբերություններում տարըմբռնում է․ դրվագային դրսևորումը «Սուրմալու»-ով տեսանք: Ռուսաստանի հետ անտագոնիզմի տարրերով պետք չէ խոսել, հավասարակշիռ քաղաքականություն է պետք: Հայ-ռուսական հարաբերություններում անկեղծության բացակայությունը եղել է վաղուց: Հայաստանին ձեռնտու չէ այս փուլում բողոքի նոտաներով խոսել ՌԴ-ի հետ, պետք է դիավանագիտական դաշտում պարզել այդ տարըմբռնումը»: