ԱՄՆ-ն սկսել է ավելի մեծ հետաքրքրություն ցուցաբերել արցախյան հարցի և ընդհանրապես տարածաշրջանի նկատմամբ: «Առաջին լրատվական»-ի հետ զրույցում նշեց ռազմաքաղաքական հարցերով փորձագետ Արեգ Քոչինյանը:
Ըստ Քոչինյանի՝ տարածաշրջանը վերաբաժանելու ռուս-թուրքական քաղաքականություն է, որին հակազդեցություն կարող է ունենալ միայն ԱՄՆ-ն․ «ԱՄՆ-ն հողի վրա ներկա չէ մեր տարածաշրջանում, իսկ Ադրբեջանը նման հոխորտանքի երաշխիքներ է ստանում ՌԴ-ից ու Թուրքիայից: ԱՄՆ-ի կողմից այս ազդակները քիչ են»:
Քաղաքագետը կարծում է, որ ՌԴ-ի կազմաքանդումը առաջացնում է շատ խնդիրներ, միջուկային մարտագլխիկները տարածված են մի շարք երկրներում․ «ՌԴ-ի դուրս գալը գլոբալ արենայից կարող է անկանխատեսելի իրավիճակ ստեղծել միջազգային հարաբերությունների կոնյուկտուրայում:ԱՄՆ-ն և Արևմուտքը խնդիր ունեն ՌԴ-ին պարտադրելու խաղալ խաղի կանոններով»:
Անդրադառնալով խոսակցություններին, թե Ադրբեջանի և Արցախի միջև ուղիղ խոսակցություններ են, քաղաքագետը նկատեց․ «Արցախում ուղիղ քաղաքական բանակցություններ չեն Ադրբեջանի հետ, կենցաղային շփում է: Արցախ-Ադրբեջան կենցաղային շփումները կարող են սերմեր դառնալ քաղաքական խոսակցության համար: Արցախյան հարցի շուրջ 5 սցենար կա, որտեղ ոչ մի լավ սցենար չկա Հայաստանի համար»: