Հյուսիսային Աֆրիկայում և Մերձավոր Արևելքում հակակառավարական հուզումները սկսվելուց հետո բրիտանական զենքի արտահանման չափերը դեպի այս շրջաններ աճել են 30%-ով: Այս մասին օգոստոսի 29-ին գրել է The Times-ը: 2011 թ.-ի փետրվար-հունիս ընկած ժամանակահատվածում Լիբիա, Բահրեյն, Սաուդյան Արաբիա և այլ երկրներ ուղարկվել է ընդհանուր առմամբ 30.5 մլն ֆունտ ստերլինգի զենք: Միևնույն ժամանակ, 2010 թ.-ի նույն ժամանակահատվածի համեմատությամբ այդ թիվը կազմել է 22.2 մլն ֆունտ ստերլինգ:
Ինչպես պարզվել է, Մաղրիբի և Մերձավոր Արևելքի երկրներում ծայր առած անկարգությունները սանձելու համար այդ երկրներ են ուղարկվել ամբոխին սանձելու համար նախատեսված հատուկ միջոցներ: Արաբական երկրներում սկսված հակակառավարական հուզումներից հետո եվրոպական մի շարք երկրներ հայտարարել են, որ դադարեցնում են զենքի արտահանումը այդ երկրներ: Արտահանման քաղաքականության վերանայման մասին հայտարարել է նաև Մեծ Բրիտանիայի ԱԳՆ-ն: The Times-ի տեղեկություններով՝ այդ երկրներ զենք արտահանելու լիցենզիայից զրկվել է ավելի քան 160 ընկերություն:
Ըստ պարբերականի տվյալների՝ Մերձավոր Արևելքի երկրներում շարունակում է գործել 600 լիցենզավորված ընկերություն, որոնք զենք են մատակարարում: Մասնավորապես՝ Մեծ Բրիտանիան շարունակում է զենք արտահանել Բահրեյն և Եգիպտոս: Ընդհանուր առմամբ՝ Մերձավոր Արևելք արտահանվում է տարեկան 1.45 մլրդ ֆունտ ստերլինգի զենք: Միևնույն ժամանակ, Մեծ Բրիտանիայի ԱԳՆ-ում հայտարարել են, որ արտահանվող զենքը չի կարող օգտագործվել երկրում բռնատիրական կարգերի ամրապնդման համար:
Մեծ Բրիտանիան աշխարհում զենքի և այլ զինատեսակների արտահանման խոշոր երկրներից է (SIPRI տվյալներով, երկիրը 2001-2010 թվականներին աշխարհում զբաղեցնում է 5-րդ տեղը): Նրա հիմնական գործընկերներն են Սաուդյան Արաբիան և Արաբական Միացյալ Էմիրությունները:
