2021 թվականի սեպտեմբերի 30-ին կառավարությունը ստացավ 15 տոկոս Զանգեզուրի պղնձամոլիբդենային կոմբինատի բաժնետոմսերից նվիրատվություն «Արդյունաբերական ընկերություն»-ից։ Ամիսներ շարունակ խոսվեց այս գործարքի ոչ թափանցիկ լինելուց։ Կառավարության նիստի ժամանակ վարչապետ Նիկոլ Փաշինյանը նշեց, որ կառավարությունը Զանգեզուրի պղնձամոլիբդենային կոմբինատում իր 6.8 տոկոսի կառավարումը ևս հանձնում է ԱՆԻՖ-ին։
«Այն ժամանակ մենք կառավարումը հանձնեցինք ԱՆԻՖ-ին կամ «Հայաստանի պետական հետաքրքրությունների հիմնադրամին»։ 2022 թ. մարտի 24-ին մենք որպես նվիրատվություն ստացել ենք ևս 6.8 տոկոս: Այն ժամանակ նվիրատվությունը որոշվել է գաղտնի, քանի որ նվիրատուն բիզնես գաղտնիությունը պահպանելու խնդիր է ունեցել: Երբ իրենց կողմից այդ գաղտնիության անհրաժեշտությունը վերացել է, արդեն մենք այդ բաժնեմասը ևս հանձնում ենք «Հայաստանի պետական հետաքրքրությունների հիմնադրամին» կառավարման համար»,- ասաց նա:
Բնապահպան-իրավաբան Նազելի Վարդանյանը «Առաջին լրատվական»-ի հետ զրույցում, անդրադառնալով գործարքին, նշեց, որ ցանկացած գործարք, այն էլ այսպիսի նշանակություն ունեցող, պետք է թափանցիկ լինի․ «Մենք պետք է ծանոթանանք այդ գործարքին, որովհետև միայն այն չէ, որ պետությունը այսօր բաժնետոմս է ստանում, կարող է այդ բաժնետոմսը այնքան պարտք ունի, որ այդ ամբողջ պարտքը ընկնում է բյուջեի վրա, և այնպես չէ, որ պետք է ուրախանանք, որ մեզ նվեր են տալիս։ Մենք պետք է ծանոթանանք պայմաններին»,-ասաց նա։
Վարդանյանը կասկսածելի է համարում նաև Զանգեզուրի պղնձամոլիբդենային կոմբինատի նախկին տնօրենի կողմից 15 միլիարդ բյուջե մուծումը․ «Մենք այդպես էլ չիմացանք որպես ի՞նչ է այդ գումարները մուծել, եթե դա գողացված էր, ինչի քրեական գործ չի հարուցվել, եթե նվեր էր, չասացին նվեր է, ասացին վնասի հատուցում։ Եթե վնաս էր պատճառվել, ինչո՞ւ որևէ քննություն չիրականացվեց, այստեղ մութ բաներ կան, և չենք կարող գնահատել։ Ես կարող եմ գնահատել այս գործընթացը ոչ թափանցիկ։ Հենց այնպես նվեր չեն տալիս։ Կարող է այնքան պարտք ունի, որ ամբողջը մեր բյուջեի վրա է շուռ գալու։ Եվ թող բացատրեն՝ ինչպես է լինում, որ մինչև հիմա նվեր չէին տվել, հիմա նվեր են տալիս, ինչպես է եղել, որ մինչև հիմա 15 միլիարդ գումար են մուծում որպես վնասի հատուցում, ու քրեական գործ չի հարուցվում։ Թող հարուցեն, թող պարզեն ինչքան է։ Պետք է իմանանք, որ որևէ գործընթաց է եղել»։
Նրա խոսքով՝ առնվազն քրեական գործ պետք է հարուցված լիներ, որ իմանայինք՝ 15 միլիա՞րդ է, թե 115 միլիարդ է, թե 300 միլիարդ։ Նա հիշեցրեց, որ դեռ 2019թվականին բնապահպանության տեսչական մարմինն արձանագրել էր, որ այնտեղ ապօրինի հանքարդյունաբերություն է տեղի ունեցել, պարզվել էր, որ 18 միլիոն տոննա ապօրինի հանքաքար էր հանվել, ևփոխանակ պարգևատրեին բնապահպանական տեսչական մարմինի ղեկավարին, ազատեցին աշխատանքից, իսկ հետո պարզվեց՝ ինչ-որ վնասի հատուցում անում։
«Շատ հարցեր կան, և մինչև այդ փաստաթղթերը մեր ձեռքի տակ չլինեն, մենք չենք կարող գնահատական տալ։ Բայց այն, որ թափանցիկ չէ այս գործընթացը, փաստ է, մինչդեռ հանքարդյունաբերության մեջ ամեն բան պետք է թափանցիկ լինի։ Կառավարության կողմից թափանցիկության սկզբունքը խախտվում է։ Եվ այնտեղ մութ գործեր են կատարվում, միջազգային չափանիշին չեն համապատասխանում։ Տեսեք՝ Հետքը գրում է, որ Ջազվեի ինչ-որ մի մենեջեր այնտեղ մեծ բաժնետոմս ունի, դա արդեն թափանցիկ չէ, այն, որ Վանեցյանի եղբայրները Կիպրոսում բաժնետոմսեր ունեն, թափանցիկ չէ, այսինքն՝ տարբեր փազլներ հավաքում ենք, հասկանում ենք, որ մի բան այն չէ, բերում գումար է մուծում որպես վնասի հատուցում նախկին տնօրենը և որևէ պատասխանատվություն չի կրում։ Հիմա մեր պետության բաժնետոսմերի տեսքով նվերները ավելանում են, ինչուների պատասխանը չկան, սա նշանակում է, որ այստեղ մի բան այն չէ, իսկ թե ինչը այն չէ, չեմ կարող ասել, ես իրաբան եմ, և ես փաստաթղթերը պետք է տեսնեմ»։
