Վրաստանում վեցերորդ անգամ տեղի կունենա «Արժանի գործընկեր» բազմազգ զորավարժությունը, որի նպատակն է բարձրացնել Վրաստանի, ԱՄՆ-ի, տարածաշրջանային գործընկերների և դաշնակից երկրների միջև պատրաստվածությունն ու փոխհամագործակցությունը՝ Սևծովյան տարածաշրջանում կայուն և անվտանգ միջավայր ապահովելու նպատակով։
Այս տարի առաջին անգամ «Արժանի գործընկեր» զորավարժությանը կմասնակցեն Ճապոնիայի և Շվեդիայի զինված ուժերի ներկայացուցիչները։ Բազմազգ զորավարժություններին ներգրավված է ավելի քան 2400 զինվորական։ Վրաստանի պաշտպանության նախարարության տվյալներով՝ այս տարվա բազմազգ զորավարժությունների մասնակիցներն են՝ Վրաստանը, ԱՄՆ-ը, Բուլղարիան, Ռումինիան, Մոլդովան, Հունաստանը, Մեծ Բրիտանիան, Թուրքիան, Սլովակիան, Նորվեգիան, Հունգարիան, Լիտվան, Ադրբեջանը, Գերմանիան, Բոսնիա և Հերցեգովինան, Էստոնիան, Լեհաստանը, Ճապոնիան, Լիտվա-Լեհաստան-Ուկրաինայի բազմազգ բրիգադը և Շվեդիայի զինված ուժերը: Զորավարժությունների ընթացքը ներկայացրել է ՊԲ հրամանատար՝ «Արժանի գործընկեր 2022»-ի ղեկավար, բրիգադային գեներալ Ռոլանդ Ձնելաձեն։
Նշենք, որ Հայաստանը վերջին անգամ զորավարժություններին մասնակցել է 2018 թվականին։Այդ ժամանակ Հայաստանը զորավարժություններին մասնակցում էր զ 4 հոգանոց սպայական կազմով։ Հայ սպաները զբաղեցնում էին տարբեր շտաբային պաշտոններ զորավարժության շտաբում:
Գլոբալիզացիայի և տարածաշրջանային համագործակցության վերլուծական կենտրոնի նախագահ, քաղաքագետ Ստեփան Գրիգորյանն «Առաջին լրատվական»-ի հետ զրույցում հիշեցնում է՝ ոչ միայն ՆԱՏՕ-ի անդամությանը ձգտող Վրաստանն է նման զորավարժություններ անցկացնում, այլ անգամ ՀԱՊԿ անդամներ Տաջիկստանն ու Ղազախստանը․ «Մենք տեսնում ենք, որ աշխարհում առկա նոր մարտահրավերները բերեցին նրան, որ պետությունները ման են գալիս լրացուցիչ լծակներ՝ պաշտպանելու իրենց անվտանգությունը։ Վրաստանն այսօր ռեալ ՆԱՏՕ-ի անդամության թեկնածու է, բայց այլ երկրներ ևս ձգտում են ու ԱՄՆ-ի հետ զորավարժություններ անցկացնել։ Հետխորհրդային մյուս երկրները ևս հասկանում են, որ անհրաժեշտ է դիվերսիֆիկացնել անվտանգությունը, փորձել ակտիվ աշխատել, որպեսզի ուժեղացնեն ու բալանսավորեն անվտանգության համակարգը»,-«Առաջին լրատվական»-ի հետ զրույցում ասաց նա։
Ըստ Գրիգորյանի՝ զարմանալի է, որ Հայաստանը նորից չմասնակցելու որոշում ունի․ «Համարում եմ, որ սա սխալ որոշում է և կոչ եմ անում կառավարությանը մասնակցել։ Եվ սա հաշվի առնելով այն հանգամանքը, որ Ռուսաստանը բացահայտ Ադրբեջանի հետ է։ Վերջին Բերձորի իրադարձություններն էլ դրա վկայությունն են։ Այն պարագայում, երբ դու անվտանգության վաակումի մեջ ես, պետք է որոնման ավելի ակտիվ պրոցես սկսես։ Իրադարձություններն արագ են զարգանում։ Այստեղ պետք է տարբեր ուղղությունների մասին մտածել՝ այդ թվում նաև այլ խաղացողներից զենք առնելու։ Ի վերջո այդ զորավարժություններին մասնակցելու դեպքում մեր բանակի ստորաբաժանումներն ավելի ուժեղ կդառնային, ավելի պատրաստված կլինեին։ Ես կարծում եմ, որ ճիշտ կլիներ մասնակցել։ Չգիտեմ, թե մեր կառավարությունը որ պատճառները թույլ չտվեցին մասնակցել, բայց ես համարում եմ, որ մենք պետք է մասնակցեինք»։
Մեր զրուցակցի դիտարկմամբ՝ ամենայն հավանականությամբ կան մտավախություններ, որ այդ մասնակցությանը դեմ կլինի Ռուսաստանը․ «Բայց փորձը ցույց է տալիս, որ ինչքան դու զգուշավոր ես, այնքան ավելի շատ ես կորցնում։ Օրինակ՝ նույն Ադրբեջանը զգուշավորություն չի ցուցաբերում։ Ադրբեջանը հիմա տարբեր տեղերում հակառուսական քայլեր է անում։ Փակեցին ռուսական «Սպուտնիկ» հեռուստաալիքը։ Նույն Ադրբեջանը Եվրամիության հետ ստորագրեց Ռուսաստանը շրջանցող էներգետիկ ծրագրեր իրականացնելու փաստաթուղթ։ Իրենք իրենց քայլերն անում են, ի՞նչ է՝ Ռուսաստանը իրեն դե՞մ է դուրս գալիս։ Ճիշտ հակառակը՝ աջակցում է։ Վախենալու այս քաղաքականությանը պետք է դադարեցնենք։ «Եթե Ռուսաստանը չլինի՝ Թուրքիան կգա մեզ կուտի» տրամաբանությունը մեր պետությունն ուղղակիորեն կործանում է։ Բացահայտ երևում է, որ մենք քայլ առ քայլ կորուստներ ենք ունենում»։
Ստեփան Գրիգորյանն առաջարկում է կառավարությանը մտածել այդ մասին ու կտրուկ քայլեր անել․ «Այլապես եթե այսպես շարունակվի՝ մոտ ժամանակներս բավականին ծանր կլինի»,-եզրափակեց նա։