Նախորդ շաբաթը հայկական սպորտի համար նշանավորվեց մեր մարզիկների փայլուն ելույթներով Եվրոպայի և աշխարհի առաջնությունում։ Բուլղարիայի մայրաքաղաք Սոֆիայում ընթացող հունահռոմեական ոճի ըմբշամարտի մինչև 20 տարեկանների աշխարհի առաջնությունում Հայաստանի ներկայացուցիչ 87 քաշային Վիգեն Նազարյանը նվաճեց ոսկե մեդալ: Եզրափակիչում հայ ըմբիշը գերլարված պայքարում հաղթանակի հասավ Իրանի ներկայացուցչի նկատմամբ: 60 քաշային կարգում Սուրեն Աղաջանյանը նվաճեց արծաթե մեդալ։ Ազատ ոճային աշխարհի Մ20 տարեկանների առաջնությունում ևս 2 մեդալ նվաճեցին՝ 1 արծաթե և 1 բրոնզե: Աշխարհի երիտասարդական առաջնության փոխչեմպիոնի տիտղոսը նվաճեցէ Մուշեղ Մկրտչյանը, իսկ բրոնզե մեդալակիր դարձավ Սերգեյ Սարգսյանը:
Թուրքիայում տեղի ունեցած բռնցքամարտի պատանիների Եվրոպայի առաջնությունում Հայաստանի ներկայացուցիչները միանգամից 6 մեդալ նվաճեցին։ Էրզրումում տեղի ունեցած մրցաշարում Եվրոպայի չեմպիոնի կոչումը նվաճեցին Համեստ Աֆրիկյանը (42 կգ) ու Սամվել Սիրամարգյանը (66 կգ)։ Եվրոպայի առաջնության բրոնզե մեդալներ դարձան Վահրամ Դովլաթբեկյանը (40 կգ), Տիգրան Հովսեփյանը (50 կգ), Ալեն Ստեփանյանը (57 կգ) և Հայկ Ղահրամանյանը (75 կգ)։«Հայկական բռնցքամարտը պատմություն է կերտում։ Առաջին անգամ՝ ի պատիվ հայ բռնցքամարտիկների, Թուրքիայում հնչում է հայոց հիմնը։ Վստահ եմ՝ մեր թիմը կարող էր ավելին անել, բայց հասկանալով՝ որ երկրում ենք ու որքան էին խանգարում ավելորդ էմոցիաներն ու լարվածությունը, այս արդյունքն էլ գոհացնող է։ Այս պատանիներին մեծ ապագա է սպասվում»,- այսպես է մեկնաբանել հայ բռնցքամարտիկների ելույթները Հայաստանի բռնցքամարտի ֆեդերացիայի նախագահ Հովհաննես Հովսեփյանը։ Ի դեպ, պատանի բռնցքամարտիկներին երեկ ընդունել է ԿԳՄՍ փոխնախարար Կարեն Գիլոյանը․ «Շնորհակալ եմ և շնորհավորում եմ: Ամենակարևորը՝ նույն տրամաբանությամբ ու աշխատասիրությամբ շարունակե՛ք մարզվել ու աշխատել: Սա դեռ սկիզբն է, պետք չէ թևավորվել այս արդյունքներից: Հիմա պետք է ավելի լավ պարապել, աշխատել, որպեսզի մեդալներ նվաճեք նաև մեծահասակների պայքարում»,- ասել է փոծնածարարը։ Ի դեպ առաջին անգամ է ի պատիվ հայ բռնցքամարտիկների Թուրքիայում հնչել ՀՀ պետական օրհներգը: Նշենք՝ Համեստ Աֆրիկյանը եզրափակչում շատ բարդ մենամարտ է անցկացրել Անգլիան ներկայացնող Սերենա Մալիի հետ։ Առաջին ռաունդում 4:1 հաշվով հաղթել է հայ մարզուհին, 2-րդ ռաունդում նույն հաշվով մրցավարներն առավելությունը տվել են Անգլիայի ներկայացուցչին։ 3-րդ վճռորոշ ռաունդում արդեն հաղթանակը շնորհվել է Համեստ Աֆրիկյանին։
Մյունխենում անցկացված Եվրոպայի մարմնամարզության առաջնությունում Հայաստանի մեծահասակների հավաքականը 1 ոսկե և 1 արծաթե մեդալ նվաճեց։ Կարիերայում երկրորդ անգամ Եվրոպայի չեմպիոնի տիտղոսը նվաճեց 38-ամյա Հարություն Մերդինյանը՝ հավասարը չունենալով նժույգթափեր վարժությունում։ Նա վաստակել է 14,733 միավոր և կանգնել պատվո հարթակի առաջին աստիճանին։ Տոկիոյի օլիմպիական խաղերի բրոնզե մեդալակիր Արթուր Դավթյանը ԵԱ-ի փոխչեմպիոնի տիտղոսը նվաճեց հենացատկից։ Նա երկու ցատկերի արդյունքում 14,983 միավոր է վաստակեց և դարձավարծաթե մեդալակիր։ Ի դեպ, չեմպիոնի կոչումը նվաճած բրիտանացի մարզիկը նույնքան միավոր էր հավաքել։ Հայաստանի հավաքականի գլխավոր մարզիչ Հակոբ Սերոբյանի պնդմամբ Դավթյանը դարձել է կողմնակալ մրցավարության զոհ։
Մյունխենում զուգահեռաբար տեղի ունեցած մարմնամարզության երիտսարդների Եվրոպայի առաջնութունում մեր հավաքականը 1 ոսկե և 2 արծաթե մեդալ նվաճեց։ Էրիկ Բաղդասարյանը Եվրոպայի չեմպիոնի տիտղոսն ու ոսկե մեդալը նվաճեց զուգափայտից, իսկ Համլետ Մանուկյանը երկու արծաթե մեդալ է նվաճել նժույգ թափեր և օղակներ վարժություններից։ Փաստորեն մեկ շաբաթվա ընթացքում Հայաստանի ներկայացուցիչները տարբեր մրցաշարերում ընդհանուր առմամբ 15 մեդալ նվաճեցին։ Հատկանշական է, որ մերոնք հաջողության հասան, թե պատանիների, թե երիտասարդների և թե մեծահասակների մրցումներում։