Վրաստանյան մի շարք հասարակական կազմակերպություններ (ՀԿ) հայտարարություն են տարածել՝ պահանջելով Ռուսաստանի քաղաքացիների համար վիզային ռեժիմ սահմանել։
Հայտարարության մեջ ՀԿ-ները պահանջում են անհապաղ վիզային ռեժիմ սահանել Ռուսաստանի քաղաքացիների համար և վերանայել նրանց իրավական կարգավիճակը, ովքեր արդեն մտել են երկրի տարածք։ «Մենք ևս մեկ անգամ մեր լիակատար աջակցությունն ենք հայտնում ուկրաինացի ժողովրդին նրա ազատության համար պայքարում, մենք ընդունում ենք, որ Ռուսաստանի Դաշնությունը Ուկրաինայում և Վրաստանում կատարել է միջազգային պատերազմի օրենքով արգելված գործողություններ և շարունակում է ոտնահարել մեր երկրի տարածքային ամբողջականությունը»,- ասված է հայտարարության մեջ: ՀԿ-ներն ուշադրություն են հրավիրել այն փաստին, որ 2022 թվականի հունվար-հունիս ամիսներին Վրաստան ռուսաստանցի այցելուների ժամանումը զգալիորեն աճել է։ Բացի այդ, Ուկրաինա Ռուսաստանի ներխուժումից հետո Վրաստանում գրանցվել է մոտ 6 400 ռուսական ընկերություն, ինչը 7 անգամ ավելի է 2021 թվականի տարեկան ցուցանիշից։ Ռուսական արտահանումը զգալիորեն աճել է: ՀԿ-ների կարծիքով՝ Վրաստան մուտք գործող ՌԴ քաղաքացիների և բիզնեսի վերահսկողությունը երկրի ազգային անվտանգության խնդիր է։ Մասնավորապես, շարունակվող օկուպացիան, Վրաստանում ՌԴ կողմից իրականացվող էթնիկ զտումները, մարդկության դեմ հանցագործությունները:
Այս հայտարարությանը չի միացել Վրաստանում գործող հայտնի հասարակական կազմակերպություններից «Բազմազգ Վրաստանը»։ ՀԿ ղեկավար Առնոլդ Ստեփանյանն իրենց որոշումն «Առաջին լրատվական»-ի հետ զրույցում բացատրեց հետևյալ կերպ․ «Հիմնական պատճառն այն է, որ կան մեծ քանակությամբ Վրաստանի նախկին քաղաքացիներ՝ ավելի քան 100․000 մարդ, ովքեր այսօր ՌԴ քաղաքացի են, բայց պարբերաբար գնում-գալիս են։ Այն հասարակական կազմակերպությունները, որոնք այդ հայտարարության տակ ստորագրել են՝ հիմնական քաղաքական նպատակով են դա արել, չկա խորքային մոտեցում։Էլ չեմ խոսում տնտեության մասին, երբ մեծ քանակությամբ զբոսաշրջիկներ են գալիս։ Դա ,ի դեպ, իշխանությունների արգումենտն է, որը կարելի է վիճարկել։Երբ խոսք է գնում այն քաղաքացիների մասին, ովքեր ինչ-որ պատճառով Ռուսաստանի քաղաքացիություն են ստացել, բայց ապրում են Վրաստանում կամ գնում-գալիս են, նրանց համար դժվարություն չստեղծելն ավելի կարևոր է։ Այդ ամենը հաշվի առնելով էլ մենք չենք ստորագրել։ Շատ մակերեսային մոտեցում է ցույց տրվել»։
Ստեփանյանի դիտարկմամբ՝ որ միայն եվրոպական հասարակական կազմակերպությունները, այլ նաև քաղաքական ուժեր են նման նախաձեռնություններով հանդես գալիս․ «Հասկանալի է, որ դա արվում է Ուկրաինայի դեմ պատերազմի ֆոնին։ Հասկանալի է, որ պետք է բոլորս կոնսոլիդացված կերպով դիմակայենք ագրեսորին։Բայց պետք է փորձել այնպես, որ քեզ ավելի ցավոտ չլինի, քան ագրեսորին»։
Մեր զրուցակիցը վստահ է՝ այդ հարցը նույնիսկ Վրաստանի խորհրդարանում չի քննարկվի, հետևաբար այն կյանքի կոչվելու կամ Հայաստանի վրա ազդեցութհյան իմաստով քննարկումները տեղին չեն․ «Առաջին պատճառն այն է, որ դա հարված կհասցնի տնտեսությանը։ Երկրորդը՝ Վրաստանի քաղաքացիների հարցը, որոնք պետք է վիզայի հարց լուծել։ Ռուսաստանում Վրաստանի հյուպատոսարան չկա, շվեյցարական դեսպանատունն է ներկայացնում մեր հետաքրքրությունը։ Նույնիսկ եթե խոսքը 100․000 մարդու մասին է։ Դուք գիտեք նաև, որ Վրաստանի իշխանությունները տարբեր պատճառներով չեն աջակցում նաև Ռուսաստանի դեմ պատժամիջոցներ սահմանելու հարցը։ Այսինքն Վրաստանի իշխանությունները որևէ կերպ հետաքրքրված չեն հիմա Ռուսաստանի դեմ նման քայլեր անելու համար»։
Առնոլդ Ստեփանյանը նշեց՝ միջպետական հարաբերությունների իմաստով Վրաստանի ու Ուկրաինայի հարաբերությունները պատմության ողջ ընթացքի կտրվածքով այժմ ամենացածր մակարդակի վրա են․ «Իսկ ահա հասարակական հարաբերությունների, ժողովուրդների շփումների, այլ քաղաքական, ոչ իշխանական շփումների իմաստով՝ շատ բարձր մակարդակում։ Ես չեմ տեսնում հեռանկար, որ այժմ հնարավոր է իշխանությունների միջև հարաբերություններ հարթել, բայց դա չի ազդի ժողովուրդների բարիդրացիական հարաբերությունների վրա։ Եթե իշխանափոխություն լինի երկրներում՝ նստվածք չի մնա, ավանդական լավ հարաբերությունները կպահպանվեն»,-եզրափակեց նա։