Ամերիկյան հեղինակավոր CNN-ն իր ճանապարհորդական շարքի շրջանակում առանձնացրել է աշխարհի լավագույն արշավային ուղղությունները՝ ներառելով նաև Հայաստանը: Հայաստանին վերաբերող հատվածը վերնագրված է՝ «Հայաստանը և Մետաքսի ճանապարհը»: Ընդգծվում է, որ Հայաստանում են Եվրոպայում լավագույն արահետներից մի քանիսը: Թեմայի շուրջ «Առաջին լրատվական»-ը զրուցել է «Տուրիզմի հայկական ֆեդերացիա» ՀԿ նախագահ Մեխակ Ապրեսյանի և «Հայ զբոսավարների գիլդիա» ՀԿ փոխնախագահ Լիա Բախշինյանի հետ:
Ապրեսյանը կարծում է, որ պետք է կազմակերպել միջազգային նշանակության միջոցառումներ, որը կնպաստի տուրիզմի զարգացմանը․ «Զբոսաշրջությամբ համաշխարհային հանրությանը պետք է ցույց տանք, որ Հայաստանում անվտանգ է: Համաշխարհային զբոսաշրջության մեջ միտում կա տարածաշրջանային արդյունքներով ներկայանալ»:
Ապրեսյանի խոսքով՝ կորոնավիրուսից հետո զբոսաշրջության շուկան վերաձևավորվում է, ամեն երկիր փորձում է գրավել շուկան ․ «Տուրիզմի ոլորտում ձեռքբերումները պետք է գեղեցիկ փաթեթավորել ու կապիտալիզացնել»:
Լիա Բախշինյանը զբոսաշրջության զարգացման մեջ կարևոր է համարում զբոսավարի դերը․ «Զբոսավարից շատ բան է կախված երկրի զբոսաշրջությունը զարգացնելու համար : Պատմության իմացությունը դեռևս չի նշանակում լավ զբոսավար: Ամեն մարդ իրավունք չունի երկիր ներկայացնել․ զբոսավարը երկրի իմիջն է ստեղծում: «Մենք քիչ ենք, բայց մեզ հայ ենք ասում»․ մեր պատմությունն ու մշակույթը ճիշտ ներկայացնելով՝ մեր երկիրը ավելի գրավիչ կդարձնենք»: