Հայաստանի բնակչությունը պակասել է: ՀՀ վիճակագրական կոմիտեն տեղեկացնում է, որ ՀՀ մշտական բնակչության թվաքանակի ցուցանիշը այս տարվա հուլիսի 1-ի դրությամբ կազմել է 2 մլն 961 հազար 900 մարդ, այդ թվում՝ քաղաքայինը՝ 1 մլն 890 հազար 200 մարդ, և գյուղականը՝ 1 մլն 71 հազար 700 մարդ: Նախորդ տարի ՀՀ մշտական բնակչության թվաքանակը կազմել է 2 մլն 964 հազար 600 մարդ, այսինքն՝ բնակչության թվաքանակը մեկ տարվա ընթացքում պակասել է 2700-ով: Բնակչության թվաքանակը պակասել է Երևանում 4000-ով: Եթե նախորդ տարվա հուլիսի 1-ի դրությամբ բնակչության թվաքանակը կազմել է 1 մլն 96 հազար 100, ապա այս տարվա նույն ժամանակահատվածում՝ 1 մլն 92 հազար 100 մարդ: Թեմայի շուրջ «Առաջին լրատվական»-ը զրուցել է ժողովրդագրագետ Արտակ Մարկոսյանի հետ:
Նրա խոսքով՝ 2018-ից հետո բնակչության թվաքանակի նվազում ունենք, բայց անկման դեպքը ընկել է․ «Միգրացիոն գործընթացների վրա շատ գործոններ են ազդում: 2020-ին ունեցել ենք բնական աճի ցածր ցուցանիշ, քանի որ կորոնավիրուս էր ու պատերազմ: Շատ հնարավոր է՝ այս տարի ծնունդների անկում չունենանք: Վերջին շրջանում կորոնավիրուսի մահերի թիվը բավականին նվազել է, որը նպաստել է՝ թե՛ բնական աճին, թե՛ բնակչության թվին»:
