Ռուսական Ми-8 ուղղաթիռը չորեքշաբթի խախտել է Էստոնիայի օդային տարածքը, հայտնել է Էստոնիայի պաշտպանության ուժերի գլխավոր շտաբի մամուլի ծառայությունը։
«Ռուսական Մի-8 ուղղաթիռն օգոստոսի 9-ի երեկոյան առանց թույլտվության մտել է Էստոնիայի օդային տարածք՝ երկրի հարավ-արևելքում գտնվող Կոյդուլա շրջանում: Ուղղաթիռն Էստոնիայի օդային տարածքում գտնվել է գրեթե մեկ րոպե: Ուղղաթիռը թռիչքի պլան չի ունեցել. հաղորդիչն անջատված է եղել, բացակայում էր նաև երկկողմանի ռադիոկապն Էստոնիայի օդային երթևեկության ծառայության հետ»,- ասված է հաղորդագրությունում։
Էստոնիայի արտաքին գործերի նախարարության մամուլի ծառայությունից հայտնում են, որ միջադեպի կապակցությամբ ԱԳՆ է կանչվել ՌԴ դեսպան Վլադիմիր Լիպաևը, որին բողոքի նոտա է հղվել սահմանը խախտելու համար։
«Էստոնիայի տեսանկյունից սա շատ լուրջ և ցավալի դեպք է, որը ոչ մի կերպ ընդունելի չէ», – նշել են ԱԳՆ-ում։
