ՄԱԿ-ի պարենի և գյուղատնտեսության կազմակերպությունը (ՊԳԿ) պարենային ապրանքների համաշխարհային գների վերաբերյալ հաղորդագրություն է տարածել, որում ասվում է, որ ՄԱԿ-ի պարենի և գյուղատնտեսության կազմակերպության (ՊԳԿ) Պարենի հենանիշային գների ինդեքսը հուլիսին միջազգային գների նշանակալի անկում է արձանագրել, որտեղ հիմնական հացահատիկային մշակաբույսերի և բուսական յուղերի գները երկնիշ տոկոսային անկում են գրանցել: ՊԳԿ պարենային ապրանքների գնային ինդեքսը հուլիսին միջինում 140,9 միավոր է կազմել, որը 8,6 տոկոսով ցածր է հունիսի ցուցանիշից, ազդարարելով հինգերորդ անընդմեջ ամսական կտրվածքով անկումը և հասնելով այս տարվա սկզբից ի վեր ամենացածր մակարդակին։ Ինդեքսը, որով գնահատվում է ամենաշատ վաճառվող պարենային ապրանքների զամբյուղի միջազգային գների ամսական փոփոխությունը, այսուհանդերձ, 13,1 տոկոսով բարձր է 2021 թվականի հունիսի ցուցանիշից։
«Առաջին լրատվական»-ը վերը նշված թեմայի շուրջ խոսել է տնտեսագետ Արմեն Քթոյանի հետ, որի խոսքով՝ եթե հաշվի առնենք, որ գների բարձր մակարդակը հիմնավորվում է՝ աշխարհում տիրող գնաճով, ապրանքերի գների բարձրացմամբ, ապա, բնականաբար, պարենային ապրանքների նվազումը, հատկապես՝ հացատիկայինի, որի դուրսբերման մասով արդեն կա որոշակի համաձայնություն, ապա դա կհանգեցնի ընդհանուր գնանկման, որից անմասն չի մնա նաև Հայաստանը։ Հացահատիկի իրացման, դրա վաճառքի մասով ճնշումները կթուլանան, ասել, որ դրանց գները միանգամից կնվազեն ու կազդեն գնաճի նվազեցման վրա, մի փոքր դժվար է, բայց ազդեցություն ունենալը մնում է անհերքելի փաստ, որովհետև կա կախում Հայաստանում գործող պաշարներից։ Պետք է փաստել, որ երևույթը դրական է և ոլորտում խաղացողների մոտ որոշակի լավատեսության նշաններ են նկատվում։
Քթոյանի նշմամբ՝ աշխարհը ներկայումս գտնվում է աննախադեպ գնաճի ժամանակահատվածում, քանի որ մասնավորապես՝ հատահատիկի գինը կրկնապատկվել է վերջին երեսուն տարիների ընթացքում, ինչը գլխավորապես պայմանավորված է՝ ռուս-ուկրաինական պատերազմով և նրանով, որ այս երկու երկրները համաշխարհային շուկայում հացահատիկի և ցորենի մասով նշանակալի մասնաբաժին ունեն և Ռուսաստանի կողմից սևծովյան նավահանգիստների շրջափակմամբ պայմանավորված՝ Ուկրաինան արտահանելու հնարավորություն չուներ ու քսան միլիոն տոննայից ավելի կուտակումներ էր ստեղծվել, սակայն հիմա միջազգային միջնորդների շնորհիվ որոշակիորեն կարգավորվել է հարցը, փորձում են որևէ կերպ, որևէ ձևաչափով կազմակերպել հացահատիկի դուրս բերումը նավահանգիստներից։ Խոշոր խաղացողներից ակնկալվում է, որ պաշարները դուրս կգան շուկա, որն իրենց կենթադրի առաջարկի ավելացում ու կնպաստի գների նվազման գործոնին։ Բարձր գնային մակարդակը չի նշանակում, որ պարեն չկա, պարզապես պարենի շուկա դուրս բերման հետ կապված առաջացել են որոշակի խնդիրներ, որոնց կարգավորման ուղղությամբ արվում են գործող քայլեր։
Տնտեսագետի կարծիքով՝ իրավիճակը ՀՀ տնտեսության վրա վատ անդրադառանալ չի կարող, կունենանք դրական միտում, քանի որ հացահատիկ ներմուծող երկիր ենք և ԵԱՏՄ շրջանակներում Ռուսաստանից հացահատիկ ստանալու հնարավորություն ևս ունենք։ Նշենք, որ ունենք որոշակի պաշարների կուտակում։ Ճիշտ է, արձանագրում ենք հացամթերքի որոշակի թանկացում, ինչը պարենային մթերքի մեջ կարևոր բաղադրիչ է հանդիսանում հենց մեզ համար, սակայն թուլացումներ ու գնանկում կլինի։ Պետք չէ շտապել, քանի որ դեռ սպառելու պաշար կա, վստահաբար, հացահատիկի մասով մեղմացումներ կլինեն։