Օրեր առաջ մշակույթի և արվեստի` հարյուրը գերազանցող գործիչներ, ի պաշտպանություն «Հայկական ժամանակ» օրաթերթի գլխավոր խմբագիր, քաղբանտարկյալ Նիկոլ Փաշինյանի, Կոնսերվատորիայի դիմացի այգում կազմակերպել էին ակցիա, որի ընթացքում ընդունվեց հայտարարություն` պահանջելով ազատ արձակել քաղբանտարկյալին: Արձակագիր Գուրգեն Խանջյանը, որը նախկինում չէր դատապարտում իշխանությունների ապօրինի գործողությունները, այս ակցիայի ժամանակ միացել է այդ ստորագրահավաքին: Ինչո՞վ է պայմանավորված նրա այդ քայլը: «Ես ոչ իշխանամետ դիրքորոշում ունեմ, ոչ էլ ընդդիմամետ: Ես ունեմ իմ տեսակետները, որոնք առանձին դեպքերում համընկնում են իշխանության դիրքորոշումներին, այլ դեպքերում` ընդդիմության: Ես Նիկոլ Փաշինյանին պաշտպանել եմ ոչ թե որպես քաղաքական գործչի, այլ` որպես լավ լրագրողի»,- «Առաջին լրատվական»-ի հարցին արձագանքեց Գուրգեն Խանջյանը: Արձակագրից հետաքրքրվեցինք, թե ինչու Գրողների միության անդամ համարվող շատ անձինք չեն հետևել Գուրգեն Խանջյանի օրինակին և միացել ի պաշտպանություն Նիկոլ Փաշինյանի կազմակերպած ակցիային: «Վախվորա՞ծ են»,- հարցրինք նրան: «Ինչո՞ւ եք ամեն ինչ վերագրում վախվորածությանը: Մարդիկ կան, ուզում են պաշտպանել՝ պաշտպանում են, մարդիկ էլ կան`չեն ուզում, նախընտրում են չպաշտպանել: Դա պարտադիր չէ, չէ՞: Ինչո՞ւ պետք է բոլորը նախիրի պես գնան, պաշտպանեն: Էս դեպքում էլ պետք է հարգել բազմակարծությունը»,- ասաց մեր զրուցակիցը: Գուրգեն Խանջյանի ուշադրությունը հրավիրեցինք այն փաստի վրա, որ այս դեպքում խոսքը ոչ թե բազմակարծության մասին է, այլ քաղաքացիական դիրքորոշման: «Մարդիկ կան, որոնք պատճառներ ունեն այս կամ այն բանը չընդունելու: Ես կողմնակից եմ նրան, որ մարդկանց պետք է ազատ թողնել հնարավորինս և չմեղադրել, թե այս չարեցին, այս արեցին»,- ասաց նա: «Առաջին լրատվականը» հետաքրքրվեց, թե արձակագիրը պատրա՞ստ է նման քաղաքացիական դիրքորոշում ցուցաբերել նաև հետագայում`այլ ակցիաների ժամանակ, անկախ այն բանից սիրու՞մ է տվյալ անձին, թե՞ ոչ: «Սիրուց անկախ գոյություն ունի նաև ճշմարտություն և արդարություն: Ես հիմա չեմ կարող ասել` հետագա ակցիաների ժամանակ կպաշտպանե՞մ, թե՞ ոչ: Նայած ինչ կլինի»,- ասաց նա:
Լուսանկարը` granish.org, Կարեն Անտաշյանի
