Հնդկաստանում շարունակվող Շախմատի համաշխարհային օլիմպիադայի 7-րդ տուրում այսօր միանձնյա առաջատար Հայաստանի հավաքականի կմրցի ԱՄՆ-ի հետ։ Առաջին խաղատախտակի վրա Գաբրիել Սարգսյանը սպտակ ֆիգուրներով կմրցի Ֆաբիանո Կարուանայի հետ, իսկ երկրորդ խաղատախտակի վրա Հրանտ Մելքումյանը սևորեվ կխաղա Ուեսլի Սոյի դեմ։ Երրորդ խաղատախտակի վրա Սամվել Տեր-Սահակյանը սև խաղաքարերով կմրցի Պերես Դոմինգեսի հետ, իսկ չորրորդ խաղատախտակի վրա Ռոբերտ Հովհաննիսյանը սպիտակներով կխաղա Սամ Շակլանդի հետ։ Փաստորեն, ԱՄՆ-ի հավաքականի երկրորդ համարը՝ Լևոն Արոնյանը հրաժարվել է խաղալ իր երկրի ազգային թիմի դեմ։
«Բնական է, որ Օլիմպիադայում ֆավորիտը ԱՄՆ թիմն է, քանի որ վարկանիշով էլ առաջինն է: Այսպիսի ուժեղ թիմի հետ դժվար խաղ կլինի: Ինչ վերաբերում է Լեւոն Արոնյանի հանդես գալուն, վստահ չեմ, որ նա կխաղա Հայաստանի դեմ: Եթե նույնիսկ հանդես գա, սա սպորտ է: Պետք է ըմբռնումով մոտենալ եւ լավագույնս դրսեւորել մեր ուժերը: Չեմ բացառում, որ Հայաստանի դեմ խաղում ԱՄՆ հավաքականի 5-րդ տախտակին թիմի փոխարինողը խաղա Լեւոն Արոնյանի փոխարեն: Ամեն դեպքում սա զուտ կանխատեսում է:Մեր հավաքի օրերին Լևոն Արոնյանը մեզ հետ Ծաղկաձորում էր: Մենք միասին շատ ենք զրուցել, մարզում ունեցել, բայց այդ թեմայի շուրջ չենք խոսել: Չկա որեւէ պայմանավորվածություն՝ նա կմասնակցի Հայաստանի հետ խաղին, թե ոչ, եթե, իհարկե, ԱՄՆ – Հայաստան հանդիպում լինի»,- օլիմպիադայի մեկնարկից առաջ ասել էր Հայաստանի հավաքականի գլխավոր մարզիչ Արման Փաշիկյանը։ Նշենք, որ Արոնյանը ԱՄՆ-ի հավաքականի կազմում ընթացիկ օլիմպիադայում մասնակցել է 5 հանդիպման տանելով մեկ հաղթանակ և չորս պարտիա ավարտելով ոչ-ոքի։ Հայազագի գրոսմայստերը բաց է թողել միայն երկրորդ տուրի Պարագվայի դեմ մրցավեճը։
Հայաստանի հավաքականի դեմ հանդիպումը կլինի երկրորդը։ Մեր հավաքականի դեմ չխաղալու Արոնյանի որոշումը կարելի է համարել մարդկային։ Այո մարզական առումով գրոսմայստերը մի կողմ դնելով էմոցիաները պետք է ցուցաբերեր պրոֆեսիոնալիզմ և մրցասպարեզ դուրս գար, բայց․․․։ Հիշեցնենք, որ նախորդ տարվա դեկտեմբերից Լևոն Արոնյանը պաշտոնապես ելույթ է ունենում ԱՄՆ-ի դրոշի ներքո։ Ինչևէ, շախմատային օլիմպիադայում 6-րդ տուրից հետո Հայաստանի ազգային հավաքականը 100 տոկոսանոց արդյունքով՝ 12 միավորով գլխավորում է մրցաշարային աղյուսակը։ ԱՄՆ-ի հավաքականը մեկ միավոր ավելի քիչ ունի։ Մեկ միավորը ամերիկյացիները կորցրել են 4-րդ տուրում ոչ-ոքի 2։2 խաղալով Ուզբեկստանի հավաքականի հետ։ Մեր ազգային թիմը մինչ այս աչքի է ընկել փայլուն խաղով։ 5-րդ տուրում Հայաստանի հավաքականն առավելության էր հասել Անգլիայի նկատմամբ, իսկ 6-րդ տուրում հաղթել Հնդկաստանի երկրորդ թիմին։
Այսօր նույնիսկ ոչ-ոքի խաղալու դեպքում Հայաստանի հավաքականը կմնա առաջատարի դիրքում։ Ավելի ստույգ 11 միավոր վաստակել է միայն ԱՄՆ-ի հավաքականը և միայն վերջինս հնարավորություն ունի շրջանցելու Հայաստանին։ Միանգամից 10 հավաքականներ այս պահին կիսում են 3-13-րդ հորիզոնականները։ Ուստի այսօր նույնիսկ ոչ-ոքի արդյունքը կարելի կլինի համարել բավարար։ Հաղթանակի դեպքում մեր հավաքականը լուրջ քայլ կկատարի դեպի մեծ հաղթանակ 2-3 միավորի առավելություն ստանալով մոտակա մրցակիցների նկատմամբ։ Ինչպես նշել էր Արման Փաշիկյանը ԱՄՆ-ի ազգային թիմը ամենաբարձր վարկանիշն ունի և այս օլիմպիադայի գլխավոր ֆավորիտն է։ Նշենք նաև, որ այս մրցաշարի չի մասնակցում Ռուսաստանի ազգային թիմը։ Վերջինս որակազրկվել է Ուկրաինայի նկատմամբ ցուցաբերած ռազմական ագրեսիայի պատճառով։
Անդրադառնանք նաև մեր կանանց հավաքականին։ Այսօր կայանալիք 7-րդ տուրում Հայաստանի հավաքականը կմրցի Իսրայելի հետ։ 6-րդ տուրից հետո Հայաստանի մերոնք 10 միավորով 6-րդն են և իրական հնարավորություն ունեն մրցանակային եռյակում հայտնվելու։ 6 խաղում Հայաստանի հավաքականը մեկ պարտություն է կրել զիջելով Էստոնիայի ընտրանուն։ Կանանց պայքարում մրցաշարային աղյուսակը 12 միավորով գլխավորում է Հնդկաստանը։