Չեմպիոնների լիգայի որակավորման փուլի առաջին խաղում այսօր Երևանի «Փյունիկը» Բելգրադում կհյուրընկալվի Սերբիայի չեմպիոն «Ցրվենա Զվեզդային»։ Առաջիկա հանդիպումը պատմական կարելի է համարել հայկական ֆուտբոլի համար։ Մասնավորապես, պատմության մեջ առաջին անգամ հայկական ակումբը ելույթ կունենա Չեմպիոնների լիգայի որակավորման երրորդ փուլում։ Այո «Փյունիկին» արդեն իսկ հաջողվել է աննախադեպ արդյունքի հասնել եվրոպական ասպարեզում, բայց․․․։ Արդյո՞ք ճիշտ կլինի բավարարվել գրանցված արդյունքով։ Մրցակցին ինչ խոսք զորեղ է։ Ֆուտբոլիստների ընդհանուր տրանսֆերային արժեքով «Ցրվենան Զվեզդան» մոտ 10 անգամ գերազանցում է Հայաստանի չեմպիոնին։ Ժամանակակից ֆուտբոլում սակայն նյութականը հաջողության հասնելու հիմնական նախապայմանը չէ։ «Փյունիկին» ապացուցեց դա Չեմպիոնների լիգայի որակավորման առաջին փուլում պայքարից դուրս թողնելով Ռումինիայի չեմպիոն «Կլուժին»։
«Մեզ հաղթանակ է պետք և մենք մոտիվացիայի կարիք չունենք։ Հիշում եմ 16 տարի առաջ այս մարզադաշտում Դեյան Ստանկովիչի դեմ խաղալիս ինչ եմ զգացել։ Հիմա պատասխանեմ նրան։ Մենք ավելի կարևոր պատասխանատվություն ենք զգում, քանզի պայքարելու ենք բավական ուժեղ թիմի դեմ։ Քիչ չեն դեպքերը երբ թույլ թիմը հաղթում է ուժեղ թիմին։ Մենք ուզում ենք վաղը դուրս գալ և ապացուցել, որ կարող ենք թույլ թիմ համարվելով հաղթել։Ամենաուժեղ թիմն էլ ունի իր թույլ կողմերը, իդեալական թիմ չկա: Այո գտել ենք «Ցրվենա Զվեզդայի» թույլ կողմերը, վերլուծել ենք, շատ բարդ սխեմա է, շատ լավ են խաղում: Կստացվի մեզ մոտ պլանն իրականացնել, թե չէ, դա երկրորդ հարցն է, բայց որ հաստատ գիտենք՝ ինչ պետք է անել դաշտում»,- նախախաղային մամուլի ասուլիսում ասել է «Փյունիկի» գլխավոր մարզիչ Եղիշե Մելիքյանը։ Նշենք, որ «Ցրվենա Զվեզդան» գլխավորում է սերբական ֆուտբոլի լեգենդներից Դեյան Ստանկովիչը։ 2006 թվականին, Եվրոպայի առաջնության ընտրական փուլում Եղիշե Մելիքյանն ու Ստանկովիչը միմյանց դեմ խաղացել են Բելգրադի «Ցրվենա Զվեզդա» մարզադաշտում։ Այդ հանդիպումն ավարտվել էր Սերբիայի հավաքականի հաղթանակով՝ 3։0 հաշվով։ 16 տարից անց Մելիքյանը մտադիր է պատասխանել Ստանկովիչին կրած պարտության համար։ Ի դեպ, այդ մրցավեճում Ստանկովիչը կրել էր թիմի ավագի թևակապը, իսկ 54-րդ րոպեին գրավել էր Հայաստանի հավաքականի դարպասը բացելով խաղի հաշիվը։ «Մեծ հարգանքով ենք մոտեցել այս խաղին, եծ հարգանք ունենք «Ցրվենա Զվեզդայի» նկատմամբ, քանի որ մեզ համար մեծ ակումբ է, և շնորհկալ եմ, որ մրցակցի մարզիչն էլ հարգում է մեզ ու հասկանում է, որ մենք էլ կարող ենք խնդիրներ ստեղծել: Լավ որակով ֆուտբոլիստներ ունեն և համագործակցությունը խաղացողների միջև շատ բարձր մակարդակի վրա է, կարողանում են կոմբինացիոն խաղ խաղալ, անհատական խաղով էլ են ուժեղ, նաև արագություն ունեն: Պետք է այդ արագությունը չեզոքացնենք, ուժեղ կողմերը փակենք, մեղր խաղը ցույց տանք, մենք էլ մեր անակնկալները մատուցենք մրցակցին: Կա վստահություն, որ կարող ենք: Չեմ վախենում, որ առաջիկա խաղում պլանը չի աշխատի: Ես կյանքում վախեցել եմ մի անգամ՝ երբ ծնվել եմ: Ֆուտբոլում վախ հասկացությունը շատ վտանգավոր ու թույլ ուղղություն է, որտեղ որ ես լինեմ, այդ թիմը վախի զգացողություն չի կարող ունենալ: Մենք ունենք հաղթելու ճիշտ ձև ու նաև պարտությունն ընդունելու ճիշտ ձև: Ուղղակի մենք պետք է այս հոգեբանությունը պահենք, որ պայքարում ենք մինչև վերջ, չհիասթափվել, չհուսահատվել ու թիմային ոգին չկորցնել դաշտում: Այդ ամենը ցույց ենք տալու խաղադաշտում, կստացվի մեզ մոտ արդյունք, թե չէ, դժվարանում եմ ասել. մրցակիցը լուրջ է: Մենք պատրաստ ենք, վաղը ցույց կտանք մեր հնարավորությունների մաքսիմումը:Ինձ թվում է՝ ինձ մոտ ստացվել է հանդերձարանում մթնոլորտը, տրամադրությունը: Դժվար էր, ժամանակը կարճ էր: Պարտությունը հաճելի չէ: Վաղն ավելի լավ կհասկանանք՝ ստացվել է, թե ոչ, բայց տեսնում եմ, որ ֆուտբոլիստները տրամադրված են ու պատրաստ են»,- նշել է Մելիքյանը: Դեյան Ստանկովիչն իր հերթին գոհավանելով հայկական թիմին հայտարարել է, որ հեշտ հանդիպում չի սպասվում։
«Նախ, ողջունում եմ Հայաստանից հյուրերին։ Կարող է, «Փյունիկը» ֆավորիտ չէ, բայց կտեսնենք անակնկալներ։ Գիտենք «Փյունիկի» խաղաոճը, սպասում ենք անակնկալների։ Նայել ենք «Փյունիկի» խաղերը, վերլուծել ենք, սպասում ենք լավ և ուժեղ խաղի։ «Փյունիկի» խաղային ձեռագիրն է` խաղի ժամանակ փոխել սխեման, դրան էլ ենք պատրաստ։ Ակնկալում ենք լավ խաղ և լեփ-լեցուն մարզադաշտ։ Ես հետևել եմ հայկական ֆուտբոլին, եղել եմ Հայաստանում, ծանոթ եմ ձեր խաղին, երիտասարդական թիմի խաղի ժամանակ եմ եղել։ Ակնկալում եմ, որ մարզիչներն ունեն թաքնված մարտավարություն, ամեն բան պարզ չէ։ Նկատել եմ, որ բավականին տաղանդավոր խաղացողներ կան, թե՛ հայ, թե՛ լեգեոներ, որոնք ուժեղացնում են թիմը։
Այո, մենք ֆավորիտ ենք համարվում, բայց չենք սպասում, թե «Փյունիկը» հենց այնպես մեզ ճանապարհ կզիջի. պետք է ջանք գործադրենք։ Կփորձենք իրագործել մեր խաղային պլանը»,- նշել է Ստանկովիչը։ «Ցրվենա-Զվեզդա»-«Փյունիկ» հանդիպումը կսկսվի Երևանի ժամանակով 22։45-ին և կցուցադրվի Առաջին ալիքով։