ՀԱԿ – իշխանություն երկխոսության կոալիցիոն աշխատանքային խմբի ՀՀԿ-ական անդամ Գագիկ Մինասյանը ակնկալում է, որ առաջիկա օրերին երկխոսությունը կշարունակվի: Լրագրողների հետ հանդիպման ժամանակ Մինասյանը նշեց, որ երկխոսության մեկնարկով ստեղծվել է ռեալ հնարավորություն, որ քաղաքական ուժերն իրենց ներուժը կօգտագործեն երկրի համար կարևորագույն հարցերին լուծումներ գտնելու ուղղությամբ: Սակայն ներկայիս իրավիճակում, երբ ՀԱԿ-ը առկախել է երկխոսությունը, ըստ Մինասյանի, այդ ներուժը վատնվելու է անիմաստ գործերի համար, և դրանից հասարակությունը ոչ մի օգուտ չի ստանալու:
ՀՀԿ-ական պատգամավորը նկատեց, որ երկխոսության անցած վեց ռաունդների ընթացքում տիրող բարյացակամ մթնոլորտը իրենց հույս է ներշնչել, որ քաղաքական այդ գործընթացը հաջողություն կունենա: Մինասյանի դիտարկմամբ՝ 7-րդ ռաունդի սկզբին ՀԱԿ-ի իրականացրած քայլերը դուրս են մինչ այդ ստեղծված մթնոլորտի տրամաբանությունից և ոչ հավասարակշռված որոշման արդյունք են: Գագիկ Մինասյանի խոսքերով՝ երկխոսությունն առկախելու ՀԱԿ-ի բերած պատճառները հիմնավոր չեն. «Այն, ինչ հիմա ՀԱԿ-ը ակնկալում է իշխանություններից, բացարձակապես հակասում է նույն ՀԱԿ-ի կոչերին, որոնցով նրանք հրապարակ էին հրավիրում ժողովրդին: Տրամաբանությունն այստեղ կաղում է»:
Մինասյանը նշեց, որ առաջիկա օրերին պարզ կլինի՝ արդյոք ՀԱԿ-ը պատրա՞ստ է վերադառնալ կառուցողական հուն, հակառակ դեպքում, ըստ պատգամավորի, կլինեն ոչ կառուցողական զարգացումներ, որոնք մեր հասարակությանը ձեռնտու չեն: Հարցին՝ ի՞նչ է հասկանում ոչ կառուցողական փուլ ասելով, Մինասյանը պատասխանեց, որ ոչ կառուցողական զարգացումները կարող են լուրջ խնդիր առաջացնել հասարակության համար, սակայն ինքը համոզված է, որ ողջախոհությունը ՀԱԿ-ի իր գործընկերների մոտ կգերակշռի: Մինասյանը համոզված է, որ ցանկացած պարագայում ոչ կառուցողական զարգացումները չեն կարող հանգեցնել արտահերթ ընտրությունների:
