Օգոստոսի 1-ին, ժամը 09:00-ից սկսած, Արցախի Հանրապետության հյուսիսային և հյուսիս-արևմտյան սահմանագոտու մի շարք հատվածներում ադրբեջանական ստորաբաժանումները դիմել են սադրանքի՝ կատարելով շփման գիծը հատելու փորձեր, որոնք կասեցվել են ՊԲ ստորաբաժանումների ուժերով: Հայկական կողմից կորուստներ չկան: Իրադրությունը շարունակում է մնալ լարված: Թեմայի շուրջ «Առաջին լրատվական»-ը զրուցել է ՄԱՀՀԻ ղեկավար Ստյոպա Սաֆարյանի հետ:
Սաֆարյանի խոսքով` ականատես ենք նախկին աշխարհակարգում ծագած կոնֆլիկտների թեժացման. «Բարդ մոզաիկա է. ամեն մի բռնկում Արցախի համար պատերազմի ռիսկերը մեծացնում են: Ադրբեջանը գիտակցում է, որ արցախյան խնդիրը լուծված չէ: Ադրբեջանի գործողությունները մատնում են, որ արցախյան կոնֆլիկտը լուծված չէ: Ադրբեջանը փորձելու է ցանկացած նման սադրանքով լարել իրավիճակը»:
Քաղաքագետը Բալկաններում և Արցախում տեղի ունեցածը կոռելյացիայի մեջ է տեսնում. «Ամեն մի կոնֆլիկտ Ադրբեջանը օգտագործելու է Արցախում իրավիճակը լարելու համար»:
Սաֆարյանը կարծում է, որ Ադրբեջանի ցանկացած առաջխաղացման փորձ հարձակում է նաև ռուս խաղաղապահների վրա. «Ադրբեջանը տարբեր եղանակներով սակարկության դաշտ է բացում, շանտաժի ենթարկում ՌԴ-ին:ՌԴ-ն խնդիրը լուծելու համար չէ Արցախում»: