ՀՀ տարածքային կառավարման և ենթակառուցվածքների նախարարությունը շրջանառության մեջ է դրել «Ավտոմոբիլային տրանսպորտի մասին» ՀՀ օրենքում փոփոխությունների նախագիծ, համաձայն որի էլեկտրոնային հարթակով ուղևորափոխադրման ծառայությունների համար յուրաքանչյուր փոխադրման դեպքում կսահմանվի պետական տուրք։ Այս մասին «Առաջին լրատվական»-ը խոսել է Սպառողների խորհրդատվության կենտրոն» ՀԿ նախագահ Կարեն Չիլինգարյանի հետ, որի փոխանցմամբ՝ ծրագրի առաջնային թերությունն այն է, որ տաքսիների կողմից ուղևորափոխադրման դիմաց որպես պետտուրք գանձվելիք բազային գնի 10 տոկոսը շատ է, առանց այդ էլ էլեկտրոնային հարթակով աշխատող տաքսի ծառայությունների սակագները թանկացել են, հետևաբար օրենսդրական նախագծի ընդունումից հետո կարող է սակագինը կրկին բարձրանալ։ Վերջին շրջանում տաքսի ծառայությունների սակագների թանկացումը հարուցել է բնակչության արդարացի դժգոհությունը, մինչդեռ դրանք նախկինում համեմատաբար մատչելի էին։ Չիլինգարյանի խոսքով՝ ծրագրում առկա են մի շարք մեծ խնդիրներ, հավանականություն կա, որ այն ծառայությունները, որոնք վերոհիշյալ կերպով են մատուցվում՝ կնկատվի սպասարկման գնի բարձրացնում, առանց այն էլ եղած բարձրացմանը։
Մի շրջան եկավ, երբ ոլորտի սպասարկման գները կտրուկ իջան, որի հետևանքով մի շարք նման կազմակերպություններ փակվեցին, սակայն արդեն իսկ, երբ մեծամասամբ շուկան գրավված է, սկսել են կտրուկ գները բարձրացնել, որը, ինչպես նշեցինք, առաջացրել է բնակչության մոտ դժոգոհության մեծ ալիք։ Սրանից հետևելով կարելի է կանխատեսել նաև այն, որ առկա բարձր գներն այս տեմպերով ավելի կաճեն։ Հնարավոր է անցում կատարվի անհատական սպասարկման ծառայություններին, այսինքն՝ չլիցենզավորված տաքսի ծառայությունների, ինչպիսիք, որ հիմա էլ կան։ Այս տեմպերով կավելանան մասնավոր տաքսի ծառայություններ, որոնց թիվը հիմա էլ քիչ չէ։
Չիլինգարյանի դիտարկմամբ՝ տասը տոկոս պետտուրքն իրոք շատ է, եթե լիներ գոնե երեք տոկոս՝ ավելի նպատակահարմար կլիներ։ Պետք է վերահսկվեր ոլորտը՝ հասկանալու համար, թե որքան ֆինանս է մտնում ու դուրս գալիս ծառայության բյուջե։ Ցանկացած դեպքում, նման տոկոսային բարձրացման հետևանքով տուժում է սպառողը։
