Իրանի արտաքին գործերի նախարար Հոսեյն Ամիր Աբդոլլահիանը և Եվրամիության արտաքին քաղաքական գերատեսչության ղեկավար Ժոզեպ Բորելը հեռախոսազրույց են ունեցել: Կողմերն անդրադարձել են միջուկային ծրագրի և հակաիրանական պատժամիջոցների վերացման շուրջ զարգացումներին։
Ըստ իրանցի դիվանագետի. «Իրանը ցանկանում է երկարաժամկետ գործարք կնքել։ Եթե Վաշինգտոնն էլ ցանկանա լուծումներ գտնել, ապա բոլոր կողմերի համար շահավետ համաձայնության կհասնենք։ Թեհրանը ողջունում է դիվանագիտության և բանակցությունների շարունակումը»։
Միջուկային ծրագրին է անդրադարձել նաև Սպիտակ տան Ազգային անվտանգության խորհրդի ռազմավարական հաղորդակցությունների համակարգող Ջոն Քիրբին, որը հայտարարել է. «Գործողությունների համատեղ համապարփակ ծրագրի վերականգնման բանակցությունները գրեթե ավարտված են: Այժմ Իրանը պետք է որոշի՝ ցանկանում է համաձայնել գործարքին, թե՞ ոչ»։
Նրա խոսքով՝ Վաշինգտոնը կպաշտպանի իրեն և իր դաշնակիցներին Իրանից եկող սպառնալիքներից և դիվանագիտական միջոցներ կկիրառի՝ թույլ չտալու Թեհրանին միջուկային զենք ստանալ:
