«Siemens Energy» ընկերությունը չորեքշաբթի երեկոյան հերքել է «Գազպրոմի» մեղադրանքները «Հյուսիսային հոսք» գազատարի անսարք տուրբինների վերանորոգման ձախողման վերաբերյալ։ «Ներկայումս մեզ հասանելի չեն տուրբինները, և դեռևս «Գազպրոմից» վնասների մասին հաղորդում չենք ստացել. հետևաբար, մենք եզրակացնում ենք, որ տուրբինները աշխատում են», – ասել է«Siemens Energy»-ն։
«Ապագայում պլանավորված սպասարկումը կարող է շարունակվել առանց խնդիրների. Կանադայի ներկայիս կառավարության հաստատումը նախատեսում է «Siemens Energy»-ի կողմից Մոնրեալում տուրբինների շարունակական սպասարկում և դրանց հետագա գործարկում», – ասվում է ընկերության հայտարարության մեջ:
Հիշեցնենք, որ չորեքշաբթի օրվանից «Գազպրոմը» «Հյուսիսային հոսք» գազատարով կրճատել է մատակարարումները մինչև իրենց առավելագույն հզորության 20 տոկոսի չափը: Ռուսաստանի Վիբորգ քաղաքից Բալթյան գազատարով Գերմանիա կհոսի օրական ոչ ավել, քան 33 մլն խմ գազ։
Կրեմլի խոսնակ Դմիտրի Պեսկովը հերքել է մեղադրանքները, թե Ռուսաստանը սահմանափակում է մատակարարումները՝ քաղաքական ճնշում գործադրելու և արևմտյան պատժամիջոցների դադարեցման և «Հյուսիսային հոսք 2» գազատարը շահագործման հանձնելու համար։ «Մատակարարը Գազպրոմն է, ոչ թե Կրեմլը։ Ընկերությունը մատակարարում է այնքան, որքան անհրաժեշտ է և տեխնիկապես հնարավոր է».- վստահեցրել է Պեսկովը։