Ռուսաստանի նախագահի մամուլի քարտուղարն առաջարկել է սպասել ուկրաինական հացահատիկի արտահանման մեխանիզմի մեկնարկին՝ դրա արդյունավետությունը գնահատելուց առաջ։
«Օդեսայի ծովային նավահանգստի ռազմական ենթակառուցվածքին ՌԴ ԶՈՒ հարվածը չի կարող և չպետք է ազդի հացահատիկի առաքման ստամբուլյան համաձայնագրերի վրա»,- երկուշաբթի լրագրողներին հայտնել է ՌԴ նախագահի մամուլի քարտուղար Դմիտրի Պեսկովը։
«Դա կապված է բացառապես ռազմական ենթակառուցվածքների հետ։ Դա ոչ մի կերպ կապված չէ ենթակառուցվածքների հետ, որը գործում է հացահատիկի արտահանման համար։ Այդ պատճառով նման ոչ մի բան չի կարող ազդել բեռնափոխադրումների գործընթացի վրա»,- ասել է Կրեմլի ներկայացուցիչը։
Պեսկովի խոսքով՝ ՄԱԿ-ը պետք է կատարի ՌԴ արտահանման սահմանափակումների վերացման վերաբերյալ պայմանավորվածությունների իր մասը։ «Տվյալ դեպքում, ՄԱԿ-ը պետք է կատարի այն մասը, որը վերաբերում է անուղղակի սահմանափակումներին, որոնք մտցվել են ռուսական հացահատիկի և պարարտանյութերի մատակարարումների դեմ։ Ուղղակի սահմանափակումներ չկան, բայց անուղղակի՝ կան, որոնք թույլ չեն տալիս լրիվ ծավալով կատարել առաքումները, որոնք այնքան անհրաժեշտ են միջազգային շուկաների համար, հատկապես՝ աշխարհի այն տարածաշրջանների, որտեղ շոշափելի սով է սկսվում: Դա շատ կարևոր է»,- ասել Է Պեսկովը ։
