Մեկ շաբաթ առաջ պատմաբան Ռաֆայել Համբարձումյանը տարածել էր մի հորդորակ, որով պահանջում էր նոյեմբերի 22-ը հայտարարել Հայրենատիրության համահայկական տոն և նշել Հայաստանում ու աշխարհի բոլոր հայաշատ երկրներում: Հորդորակը ստորագրել էին հանրությանը ծանոթ ու անծանոթ մի շարք գործիչներ: Այս օրերին «պետական կարիքների» անվան ներքո սեփական տնից զրկված և փողոցում հայտնված քաղաքացի Գագիկ Սարգսյանը հացադուլ է հայտարարել ՄԱԿ-ի հայաստանյան գրասենյակի առջև, որը, սակայն, չի արժանանում այդ նույն գործիչների ուշադրությանը: Մեկ այլ քաղաքացի` Մարիամ Գիշյանը, դարձյալ նույն պատճառով մեկնել է Թուրքիա և այնտեղի իշխանություններից բնակարան խնդրել, և դարձյալ մատնված է անտարբերության: Ինչո՞վ են այդ երևույթը մեկնաբանում մտավորականները: «Մխիթար Սեբաստացի» կրթահամալիրի գեղարվեստի վարժարանի տնօրեն, արվեստագետ Գրիգոր Խաչատրյանը «Առաջին լրատվական»-ի հարցին հարցով արձագանքեց. «Կա՞ն այդ գործիչների մեջ մեկ-երկուսը, որոնք ստորագրել են Նիկոլ Փաշինյանին ազատ արձակելու պահանջի տակ: Ամենակարևոր, ամենառեալ բանն այսօր Հայաստանի քաղաքացու իրավունքները, շահերը պաշտպանելն է: Մնացած բաները շոու են, և նման հայտարարություններ անողները շոու-բիզնեսի մեջ են տեղավորվում: Նրանք բոլորը սպասարկում են բուրժուական ճաշակին»: Նկարիչ Կարինե Մացակյանը տնից զրկվելու պատճառով հացադուլ հայտարարած և Թուրքիա մեկնած քաղաքացիների նկատմամբ անտարբերությունը բացատրում է հասարակության ապատիայով: Նրա դիտարկմամբ` մեր հասարակությունը կենտրոնացած է իր սոցիալական խնդիրները լուծելու վրա: Ինչ վերաբերում է ազգայնական գործիչներին, ապա, ըստ Կարինե Մացակյանի, նրանք պատվերներ են կատարում և ծառայություններ մատուցում իշխանություններին: «Վերջերս հենց էմոների հետ կատարվածը ես համարում եմ մանիպուլյացիա»,- նշեց մեր զրուցակիցը: Արվեստաբան Նազարեթ Կարոյանն էլ կարծում է, որ այն մարդկանց համար, որոնք խոսում են հայրենասիրությունից և պահանջում Հայրենատիրության օր նշել, չի ենթադրվում, որ պետք է սեփական իրավունքների համար ՄԱԿ-ի հայաստանյան գրասենյակի առջև հացադուլ հայտարարել: Սեփական իրավունքների համար պայքարող մարդկանց նրանք կարող են միայն քննադատել, որպեսզի իրենց կարգախոսը պաշտպանվի: «Չնայած ես կարծում եմ, որ իրենց կարգախոսներին էլ լուրջ չեն վերաբերվում»,- ասաց մեր զրուցակիցը: