Չեմպիոնների լիգայի խաղարկության որակավորման երկրորդ փուլի առաջին խաղում Երևանի «Փյունիկը» Վազգեն Սարգսյանի անվան «Հանրապետական» մարզադաշտում նվազագույն հաշվով զիջեց Լյուքսեմբուրգի չեմպիոն «Դյուդելանժին»։ Ընդամենը մեկ շաբաթ առաջ մեր չեմպիոնը պայքարից դուրս էր թողել կարգով մի քանի անգամ ավելի բարձր՝ Ռումինիայի չեմպիոն «Կլուժին»։ Թե բուքմեյքերները, թե երկրպագուները կարծում էին, որ սեփական հարկի տակ «Փյունիկին» կհաջողվի հաղթել «Դյուդելանժին», բայց․․․։ Երեկվա հանդիպումնը մեծ հաշվով ընթացավ հավասար պայքարում։ Առաջին կեսում մեր թիմն ուներ մրցակցի դարպասը գրավելու մի քանի լավ հնարավորություն։ Թվում էր թե երկրորդ կեսում «Փյունիկը» կմեծացնի ճնշումը և առաջ կանցնի հաշվի մեջ։ Ցավոք տեղի ունեցավ հակառակը։ Իրականում ինչու պարտվեց «Փյունիկը» և որն էր ձախողման հիմնական պատճառը։ «Կլուժի» դեմ երկու հանդիպումներում Եղիշե Մելիքյանի գլխավորած թիմը խաղաց երկրորդ համարով։ Այսինքն կազմելով երկշերտ պաշտպանություն մերոնք կասեցնում էին մրցակցի առաջխաղացումը և փորձում հակագրոհել։ Կարգով ավելի բարձր թիմերի դեմ այս մարտավարությունը թերևս այլընտրանքային է։ «Դյուդելանժի» դեմ առաջին մրցավեճում «Փյունիկը» պետք է խաղար առաջին համարով և լինել թելադրողի դերում։ Ներկայիս կազմով Հայաստանի չեմպիոնն առաջին անգամ խաղաց առաջին համարով։
Չմոռանանք, որ մրցաշրջանի ավարտից հետո «Փյունիկի» կազմի հիմնական մասը փոփոխվել է։ «Փյունիկի» մարզիչներին կարճ ժամանակում հաջողվեց մշակել երկրորդ համարով խաղալու մարտավարությունը, իսկ ահա առաջին համարով գործելու սխեման թերի էր։ Անդրադառնանք թերևս մեկ դրվագի։ «Փյունիկը» մշտապես խնդիրներ էր ունենում երբ դարպասապահ Դավիթ Յուրչենկոն գնդակը մտցնում էր խաղի մեջ։ Արդեն գրոհներ սկսելիս «Փյունիկի» միջին օղակում առաջանում էր լարվածություն։ «Խաղի սկիզբը խառն էր, մրցակիցը հեռվից պահ ստեղծեց, դարպասաձողը փրկեց: Հետո կարողացանք վերահսկել խաղը: Առաջին խաղակեսում մենք ունեցանք առավելություն, պահեր ստեղծեցինք, շատ մոտ էինք գոլ խփելուն:Չնայած՝ այս եղանակին շատ դժվար էր պահել խաղի բարձր տեմպը, բայց կարծում եմ, որ խաղի նախաձեռնությունը մեր ձեռքում էր:Երկրորդ կեսում փորձեցինք վերադառնալ խաղի մեջ, չստացվեց: Ունենք այն, ինչ ունենք: Սա երկու խաղով դիմակայություն է: Առջևում պատասխան խաղն է, որին մենք լրջորեն կպատրաստվենք: Մրցակիցը կազմակերպված էր գործում և խաղացված թիմ է։ Մենք շատ դրվագներում անփույթ գտնվեցինք։ Ամեն դեպքում պարտությունը չի կարելի ոչ վատ արդյունք համարել, բայց առաջինը, ինչ ասացինք տղաներին հանդերձարանում այն էր, որ գլուխները բարձր պահեն ու մեծ հույսերով պատրաստվելու ենք պատասխան խաղին։Ոչ թե գոհ չենք հարձակվողներից, այլ գոհ չենք, որ դեռ գոլեր չկան, բայց սա նորմալ է, նրանք նոր են միացել թիմին։Տեսաք, որ խաղավերջում մենք կրկին առավելություն ունեինք և մեծ ճնշում էինք գործադրում, տրիբունաները դա նույնպես զգացին, թիմը ֆիզիկապես լավ է պատրաստված, ցանկություն ուներ, միան գոլեր չեղան։ Նախախաղային ասուլիսին ասել էի, որ մրցակիցը կազմակերպված թիմ է, կարողանում է պաշտպանվել և հարձակվել։
Հանդերձարանում տղաներն ու մարզչական շտաբը լի էին վստահությամբ, որ պատասխան խաղն ավելի լավն է լինելու»,- խաղից հետո ասել է «Փյունիկի» մարզիչ Ռոման Մոնարյովը։ Հիշեցնենք, որ երևանյան թիմի գլխավոր մարզիչ Եղիշե Մելիքյանը որակզարկված էր և երեկվա հանդիպմանը հետևեց տրիբունայիից։ Ասել, որ այս պարտությունը «Փյունիկին» դուրս մղեց Չեմպիոնների լիգայի միանգմայան ճիշտ չի լինի։ Եթե անկեղծ լինենք, այո երեկ գրանցված արդյունքը օբյետիվ է։ Այո եթե բախտը ժպտար մեզ հնարավոր է ոչ-ոքի խաղային, նույնիսկ հաղթեինք։
Նվազագույն հաշվով պարտությունը հետևություններ անելու և սխալներն ուղղելու շարժառիթ պետք է հանդիսանա։ Այո «Փյունիկն» ունի այն ներուժը որը թույլ կտա պատասխան խաղում հաղթել և դուրս գալ Չեմպիոնների լիգայի խաղարկության որակավորման երրորդ փուլ։ «Դյուդելանժ»-«Փյունիկ» հանդիպումը տեղի կունենա հուլիսի 26-ին։