«Թուրքիան բալանսավորման բարդ խաղ է վարում։ Անկարան օգնում է Ուկրաինային՝ հացահատիկի արտահանման նավահանգիստների ապաշրջափակման հարցում, ինչպես նաև՝ ցույց է տալիս, որ պատրաստ է օգնել Ռուսաստանին: Թուրքիան ՆԱՏՕ-ի անդամ է և իրեն կառուցողական է պահում Շվեդիայի և Ֆինլանդիայի անդամակցության հարցում»,- այս մասին Forbes-ին տված հարցազրույցում հայտարարել Է Ուկրաինայի արտգործնախարար Դմիտրի Կուլեբան։ Նրա խոսքով՝ Ուկրաինան Թուրքիային վերաբերող հարցեր ունի:
«Մենք թուրք գործընկերների հետ սկսել ենք բացահայտ խոսել դրանց մասին։ Ինչպես ընկերների հարաբերություններում, կան մի քանի փուլեր. սկզբում սկսում ես նկատել, որ ինչ-որ բան այն չէ, բայց լռում ես. դե, ընկեր է։ Հետո այն աճում է, և դու հասկանում ես, որ եկել է խոսելու ժամանակը։ Մենք սկսեցինք այդ խոսակցությունը։ Մեզ Թուրքիան շատ է օգնել ռազմական, քաղաքական առումով, բայց եթե հարցեր են առաջանում, մենք դրանք պիտի լուծենք»,- նշել է Կուլեբան։
Նախարարի խոսքով՝ մոտ ժամանակներս կարող են լիարժեք բանակցություններ տեղի ունենալ Ուկրաինայի և Թուրքիայի միջև, որտեղ դեմ առ դեմ կքննարկեն բոլոր հարցերը:
