Ադրբեջանի նախագահի աշխատակազմի միջազգային հարցերի վարչության ղեկավար Նովրուզ Մամեդովը հայտարարել է, թե Իլհամ Ալիև-Ուիլյամ Բըրնս հանդիպման վերաբերյալ ԱՄՆ դիվանագետների պաշտոնական հեռագրում Ադրբեջանի նախագահին վերագրված հայտարարություններն իրականությանը չեն համապատասխանում, հայտնում է1news.az-ը:
«Ես մասնակցել եմ նախագահ Ալիևի և Ուիլյամ Բըրնսի հանդիդպմանը, այս հանդիպումը տեղի էր ունենում երկու հարցերի շուրջ, առաջինը` ղարաբաղյան հակամարտության և երկրորդը՝ երկկողմ հարաբերությունները ԱՄՆ-ի և Ադրբեջանի միջև: Նման հանդիպումների ընթացքում Ադրբեջանի նախագահը երրորդ կողմի կամ երկրի մասին չի խոսում: Վերը նշված` Ուիլյամ Բըրնսի հետ հանդիպման ժամանակ նույնպես»,- պարզաբանել է Նովրուզ Մամեդովը: «Ինչպես երևում է, կան ուժեր, որոնք փորձում են փչացնել տարբեր երկրների հետ մեր հարաբերությունները, և նրանք այդ ուղղությամբ արդեն որոշակի քայլեր են ձեռնարկում: Սա վտանգավոր միտում է»,- դժգոհել է Նովրուզ Մամեդովն ու հավելել. «ԵԱՀԿ Աստանայի գագաթաժողովին ընդառաջ նման հարցերի առաջ գալը ստիպում է խորհել: Այսինքն` նման տեղեկատվության տարածումը գագաթաժողովի անցկացմանը զուգահեռ միջազգային հանրության մոտ որոշ հարցեր է առաջացնում»:
