Երևանի պետական համալսարանում Կենսաբանության 33-րդ միջազգային օլիմպիադայի շրջանակում մասնակիցների համար առաջին անգամ նոր ձևաչափով անցկացվեց «Միջազգային խմբային աշխատանք» միջոցառումը։ Պաստառներով գիտական նախագիծ ներկայացնելը նոր առաջադրանք է օլիմպիադայի մասնակիցների համար:
Մասնակիցներից Մանե Կուրղինյանը պատմեց, որ ամիսներ առաջ իր թիմի անդամների հետ օնլայն ձևաչափով պատրաստել են նյութը, իսկ այսօր արտերկրից ժամանած ժյուրին պիտի ընտրի հաղթողներին: «Իմ թիմում 4 հոգի են ներառված Բանգլադեշից, Արգենտինայից, Հարավային Կորեայից: Մենք Հանթինգթոնի հիվանդության բուժման մասին ենք պաստառ պատրաստել,առաջարկել ենք հիվանդության բուժումը, որը մինչ այժմ չի կիրառվել»,-ասաց նա:
Միջազգային խմբային աշխատանքի ղեկավար Մհեր Կուրղինյանն ասաց, որ միջազգային խմբային աշխատանքը նոր ձևաչափ է կենսաբանության միջազգային օլիմպիադայում, որն առաջին անգամ 2020 թվականին է անցկացվել Ճապոնիայում, և Հայաստանը ևս մասնակցել է: «Տարբեր ուսանողներ, տարբեր երկրներից միասին թիմեր են կազմել ու պատրաստել են գիտական պաստառներ՝ օնլայն հարթակում: Ժյուրիները հարցեր կտան մասնակիցներին, ապա կընտրեն հաղթողներին»,-նշեց նա:
Մեծ Բրիտանիայից Հայաստան ժամանած Մերի Օլիվերն ասաց,որ արդեն հինգ տարի է օլիմպիադայի ժյուրիի կազմում է: «Մենք նախապես ծանոթացել ենք պաստառներին, ստուգել ենք աղբյուրները, ապա՝ հարցեր տալուց հետո կորոշենք հաղթողին»,-ասաց նա՝ հավելելով, որ հիմնականում շեշտը դնելու են աշակերտների խմբային աշխատանքի հմտությունների վրա: