«Առաջին լրատվական»-ի զրուցակիցն է Ամերիկայի Հայկական համագումարի տարածաշրջանային գրասենյակի տնօրեն Արփի Վարդանյանը։
-Տիկին Վարդանյան, ԱՄՆ նախագահ Ջո Բայդենը Հայաստանում նոր դեսպանի պաշտոնում Սենատին է ներկայացրել Ուկրաինայում ԱՄՆ գործերի նախկին հավատարմատար Քրիստինա Քվիենի թեկնածությունը: Ինչպե՞ս եք գնահատում այս հանգամանքը և նոր դեսպանից ի՞նչ ակնկալիքներ ունեք։
–Նորմալ գործընթաց է։ Նախագահն առաջարկում է, Սենատը պետք է հաստատի։ Կլինեն լսումներ ու քվեարկություն՝ ընդունում են, թե՞ ոչ։Եթե ընդունեցին՝ թեկնածությունը կհաստատվի։ Մենք հուսով ենք, որ այդ պրոցեսն արագ կլինի, երկար չի տևի։ Հատկապես Հայաստանի համար դա նախընտրելի չէ։ Ինչքան շուտ հաստատվի դեսպանի թեկնածությունը, այնքան շուտ նոր դեսպանը կկարողանա աշխատել ու ԱՄՆ-ին ներկայացնել Հայաստանի Հանրապետությունը։
-Քրիստինե Քվիենը աշխատել է նաև Ուկրաինայում։ Ձեր դիտարկմամբ՝ Հայաստանը և՞ս կարևոր երկր է ԱՄՆ-ի համար։
–Ես կարծում եմ, որ Հայաստանը ևս մեծ կարևորություն ունի։ Չգիտեմ դեռ քանի դեսպան կա, որ պետք է հաստատման պրոցես անցնի, բայց հուսով եմ, որ պրոցեսը չի ձգձգվի։
-Կոնկրետ դեսպանի գործունեությունից շա՞տ բան է կախված հայ-ամերիկյան հարաբերություններում։
–Ընթերցողների համար նշեմ, որ ԱՄՆ դեսպանները սովորաբար նշանակվում են երեք տարվա ժամկետով։ Տիկին Թրեյսիի ժամկետը լրանում է ու այս փոփոխությունը հենց դրանով է պայմանավորված։
Սենատորները լսումների ժամանակ մի շարք հարցեր են հղելու։ Նախքան ԱՄՆ-ի կողմից Հայոց ցեղասպանությունը ճանաչելու հանգամանքը մշտապես սենատորները հղում էին այն հարցը, թե դեսպանն ինչ մոտեցում ունի։ Հիմա այս հարցը չի հնչի, կլինեն այլ ուշագրավ հարցեր։ Բոլորս կհետևենք տեսնենք, թե ինչ է ասում։
Ինչ վերաբերում է կոնկրետ դեսպանի գործունեությանը, ապա ես կարծում եմ, որ դեսպանի դերը Հայաստանում շատ կարևոր է։ Դեսպանն է հաղորդում հիմնական իմֆորմացիան Պետդեպին՝ առ այն, թե ինչ լուրեր, ինչ բարեփոխումներ կան երկրում կամ գուցե ավելի վատ զարգացումները։ Կարող են տեղեկություններ փոխանցվել նաև տարածաշրջանային զարգացումների մասին, ուստի ես դեսպանների դերը շատ կարևոր եմ համարում։ Իհարկե մեծ բան է կախված նաև Վաշինգտոնի ցանկությունից և ես հուսով եմ, որ Հայաստանի մասով այդ դրական մոտեցումը ԱՄՆ-ում կա։
