WikiLeaks-յան վերջին բացահայտումներից մեկն առնչվում է ԱԺ ներկայիս խոսնակ Հովիկ Աբրահամյանի՝ «սուպերնախարարություն» գլխավորելու հիմնախնդրին։ Երևանում ԱՄՆ դեսպանատնից Վաշինգտոն ուղարկված հաղորդագրությունը թվագրված է 2005 թվականի հունվարի 21-ով։
Հունվարի 19-ին հայտնի դարձավ, որ տարածքային կառավարման նախարար Հովիկ Աբրահամյանը կարող է գլխավորել կառավարությունում ստեղծվելիք նոր «սուպերնախարարությունը»։ Այս նոր նշանակումը նախագահ Ռոբերտ Քոչարյանի մերձավոր Հովիկ Աբրահամյանին փաստացիորեն վերածում է փոխվարչապետի՝ վարչական տարբեր ոլորտներում նրան վերահսկման լայն հնարավորություններ ընձեռելով։
Բացի տեղական ինքնակառավարման մարմինների վրա ունեցած վերահսկողությունից, նրա պատասխանատվության գոտում են հայտնվում երեք այլ պետական գերատեսչություններ՝ ջրային պաշարներ, արտակարգ իրավիճակներ, փախստականներ ու միգրացիա։
Հայաստանի կառավարությունը դեռևս հանդես չի եկել այս մասին պաշտոնական հայտարարությամբ, սակայն դա ակնկալվում է առաջիկա շաբաթներին։
«Մուկ» մականվամբ (նկատի է առնվել նրա կարճահասակ լինելը) հայտնի Հովիկ Աբրահամյանին բազմիցս մեղադրել են հօգուտ Քոչարյանի խարդավանքներ իրականացնելու մեջ, այդ թվում՝ նաև 1998 և 2003 թվականների ընտրությունների ժամանակ։ Մի շարք վերլուծաբանների կարծիքով՝ որպես նոր «սուպերնախարար» Աբրահամյանը կարող է հակակշռի դեր ծառայել վարչապետ Անդրանիկ Մարգարյանի և ավելի քիչ չափով շտաբի պետ Մանուկ Թոփուզյանի հանդեպ բարյացակամ տրամադրված զանգվածի դեմ։
Դա համապատասխանում է Քոչարյանի շահերին, ով դրանով ցանկանում է կառավարությունում պահպանել իշխանության հանդեպ բարյացակամ տրամադրվածների նուրբ հավասարակշռությունը և, ըստ էության, ապահովել այն, որ ոչ մի ֆիգուր գերակա դիրքեր չունենա կառավարությունում։ Քոչարյանն Աբրահամյանին ավելի շատ է վստահում, քան՝ վարչապետին»։