Արմավիրի մարզ այցելության շրջանակում ՀՀ վարչապետ Նիկոլ Փաշինյանին դիմեցին որոշ գյուղացիներ իրենց բերքի իրացման հարցի հետ կապված: Փաշինյանն առաջ քաշեց գյուղատնտեսական կոոպերատիվներ ստեղծելու հարցն, պայմանավորվեցին՝ գյուղացիներն ու էկոնոմիկայի փոխնախարարն այդ հարցերը պետք է մանրամասն քննարկեն, փորձեն կարգավորման հասնել:
Վարչապետին մոտեցած գյուղացիներից մեկը հետաքրքրվեց՝ պետությունն ի՞նչ է մտածում գյուղացու արտադրած ապրանքի իրացման խնդրի հետ կապված:
«Ձեր իրար կպած 20 հա հողը հավաքվում եք, գրում եք, ստորագրում եք, նամակն ուղարկում էկոնոմիկայի փոխնախարար Արման Խոջոյանին, որ հողատերերով պատրաստ եք գնալ, քննարկել գյուղատնտեսական կոոպերատիվ ստեղծելու հարցը, ձեզ տան պայմանները»,-ասաց վարչապետը:
Փաշինյանը Խոջոյանին հորդորեց, որ նա անձամբ գնա գյուղ՝ գյուղացիների հետ պայմանները քննարկելու:
Դիմելով իրեն դիմած գյուղացիներին՝ նա ասաց. «Դուք պետք է կառավարիչ բերեք, որ դուք աճեցնեք, տաք իրեն, ինքը տանի»:
Նա փոխնախարարին հորդորեց հետևողական լինել, այդ հարցի մասին տեղեկացնել նաև իրեն:
«Սա այն դեպքն է, որ ասում ենք՝ օգնեք մեզ՝ օգնել ձեզ: Այդ ընթացքում կհասկանանք, թե խնդիրները որտեղ են, ինչ խոչընդոտներ կան: Գուցե, օրենսդրական փոփոխություններ կանենք, գուցե կարգավորման փոփոխություններ անենք, և գուցե այդ ամեն ինչը ստացվի»,-ասաց Փաշինյանը՝ պայմանավորվելով իրեն դիմած գյուղացիների հետ: