Եվրոպական խորհրդի նախագահ Շառլ Միշելը օրերս հեռախոսազրույց է ունեցել Ադրբեջանի նախագահի հետ, որի ընթացքում քննարկվել են բրյուսելյան վերջին հանդիպման օրակարգային հարցերը:
Շառլ Միշելն, ըստ իր թվիթերյան հրապարակման, ընդգծել է Եվրոպական խորհրդի համար Հարավային Կովկասում խաղաղության, կայունության ու անվտանգության ապահովման կարևորությունը: Նա նշել է, որ Բրյուսելը ջանքեր է գործադրում Հայաստանի ու Ադրբեջանի հարաբերությունների կարգավորման, խաղաղության պայմանագրի ստորագրման, սահմանազատման ու տրանսպորտային, հաղորդակցական ուղիների բացման ուղղությամբ:
Իլհամ Ալիևն, իր հերթին, հիշելով Բրյուսելում կազմակերպված եռակողմ հանդիպումներն ու ձեռք բերված պայմանավորվածությունները` հույս է հայտնել, որ Շառլ Միշելի նշած օրակարգային բոլոր հարցերի համար իրական արդյունքներ կլինեն, հաղորդում է ադրբեջանական կողմը:
Ադրբեջանի ղեկավարը նաև նշել է 44-օրյա պատերազմի արդյունքում Բաքվի վերահսկողության տակ անցած տարածքներում ականների խնդրի մասին, ինչպես նաև ղարաբաղյան առաջին պատերազմի ժամանակ անհետ կորած համարվող շուրջ 4000 ադրբեջանցիների ճակատագրի պարզաբանման կարևորությունը:
Ռուսաստանցի քաղաքագետ Ստանիսլավ Տարասովը համարում է, որ որքան էլ Բրյուսելը հայ-ադրբեջանական դեռևս չլուծված հարցերի շուրջ փորձի միջնորդական ջանքեր գործադրել, Մոսկվան այդ հարցերում իր նախաձեռնողականությունը բաց չի թողնի․ «Եկեք հարցն այսպես դիտարկենք՝ Մոսկվա-Բրյուսել զուգահեռ գործընթացները մոսկովյան «նախագիծ» չէ։ Ինչու՞ մենք պետք է միանգամից երկու հարթակներում խաղանք։ Ուստի՞ ում նախագիծն է, Բաքվի՞, թե՞ Երևանի։ Ես կարծում եմ, որ Բրյուսելը Մոսկվային զուգահեռ գործընթաց է նախաձեռնում Երևանի համար։ Համենայնդեպս Բաքուն դրանով հետաքրքրված չէ, որովհետև սովորել է աշխատել ու խոսել Մոսկվայի հետ։ Այդ իմաստով նա խնդիրներ չունի»,-«Առաջին լրատվական»-ի հետ զրույցում ասաց նա։
Օրեր առաջ հայտնի դարձավ, որ Ադրբեջանը երկու անգամ հետաձգել է Ադրբեջանի և Հայաստանի Անվտանգության խորհրդի քարտուղարների մակադակով անցկացվելիք բրյուսելյան հանդիպումները։ Ստանիսլավ Տարասովը գտնում է, որ այս հանգամանքը պատական չէ․ «Սա նշանակում է, որ Եվրամիության կողմից առաջարկվող օրակարգն ի տարբերություն Մոսկվայի, իրեն ձեռնտու չէ։ Ինչպես գիտեք՝ այդ հանդիպումները պետք է անցկացվեին Բրյուսելում։ Դուք գիտեք, որ Եվրամիությունը մտադիր է վերականգնել ԵԱՀԿ Մինսկի խումբը, ղարաբաղյան հակամարտությունը, կարգավիճակի հարցը, մինչդեռ Բաքուն համարում է, որ նման խնդիր գոյություն չունի։ Ալիևին հիմա այդպիսի դիրքորոշումը ձեռնտու չէ»,-նկատեց քաղաքագետը։
Միևնույն ժամանակ մեր զրուցակիցն ասում է, որ Երևանին Բրյուսելի այդպիսի դիրքորոշումը ձեռնտու է, իսկ ահա Մոսկվան այս հարցում չեզոք դիրքորոշում ունի․ «Մոսկվան համարում է, որ այն առճակատումը, որ այժմ կա արևմուտքի ու Ռուսաստանի միջև՝ թույլ չի տալիս ղարաբաղյան հակամարտությունը լուծել մեկ ընդհանուր ձևաչափում։ Ըստ Մոսկվայի՝ հարցը կարելի է լուծել այլ ֆորմատներում՝ այդ թվում նաև Մոսկվայի ու Բաքվի միջև պայմանավորվածություններով։ Սա հնարավոր կոմբինացիաներից մեկն է, թե ինչպես այն կռեալիզացվի՝ ապագան ցույց կտա»։
Մոսկվան արդյոք թույլ կտա, որ Բրյուսելն այս հարցում առաջ քաշի իր օրակարգը, Մոսկվային ստվերում թողնելով, Ստանիսլավ Տարասովն ասաց․ «Մենք բավականին հաջող կերպով ավարտում ենք պատերազմն Ուկրաինայում։ Միթե դուք կարծում եք, որ Անդրկովկասում Բրյուսելին առաջ կթողնենք։ Իհարկե ո՛չ։ Բրյուսելի նախաձեռնությունները Մոսկվայի համար այնքան էլ ընդունելի չեն լինի»։
