WikiLeaks կայքում այսօր հրապարակված ամերիկյան դիվանագիտական փաստաթղթերից մեկն անդրադարձել է այն իրավիճակին, որը գոյություն ունի երևանյան փողոցներում: Փաստաթուղթը թվագրված է 2004 թ. ապրիլի 4-ով:
Հայաստանում ամերիկյան դեսպանատան նամակագրության մեջ նշվում է, որ հաճախ ցուցամոլությունից դրդված, որպես առավելություն ոստիկանությունից գնում են «գոլդ» համարներ` մեծ գումարներ վճարելով դրանց համար: Լավ պետահամարնիշերը հաճախ իդենտիֆիկացնում են օլիգարխներին իրենց բարեկամներով և նրանց պատկանելությունը այս կամ այն խմբին: Պետհամարանիշերը նշան են ոստիկանությանը` մեքենայի սեփականատիրոջ եկամուտների մասին:
Փաստաթղթում նշվում է, որ ոստիկանության շնորհիվ օլիգարխները իրավունք ունեն տնօրինելու իրենց կողմից ընտրված թվերի համադրությամբ բոլոր սերիաների պետհամարանիշերը, հատկապես եթե դրանց մեջ երկու զրոներ կան:
Փաստաթղթում նշվում է Երևանի փողոցներում հայտնված 4 Hummer մակնիշի մեքենաների մասին, որոնցից մեկը պատկանում է Գագիկ Ծառուկյանին (Դոդի Գագո – մականունները բերված են հենց ամերիկյան փաստաթղթում.- 1in.am): Ծառուկյանն իրավունք ունի տնօրինելու 08xx008 բոլոր սերիաների պետհամարանիշերը` իր, իր ընտանիքի անդամների և թիկնազորի համար:
Նույնը Սամվել Ալեքսանյանի (Լֆիկ Սամո) դեպքում է, որին է պատկանում այդ ժամանակվա երկրորդ «Համերը»` 06xx006 տարբեր սերիաների պետհամարանիշերով, որին հետևում է Ռուբեն Հայրապետյանը (Նեմեց Ռուբո)` 05xx005 պետհամարանիշերի շարքով, ինչպես նաև նախագահ Քոչարյանի որդին` 07uu007 պետհամարանիշով: 07-երով պետհամարանիշերի տարբեր սերիաները կարելի է գնել ճանապարհային ոստիկանությունից 2-3 հազար դոլարով:
Սակայն այս համարները հասանելի են նաև սովորական մահկանացուներին: Դիվանագիտական փաստաթղթում հեգնում են, որ մեքենայի խանութում «Նիվա» մակնիշի մեքենան արժե 3 հազար դոլար, սակայն 08ԼՏ009 պետհամարանիշով նրա գինը հասնում է 4.5 հազարի: 44ԼԼ333 կամ 12ԼԼ345 պետհամարանիշերը հնարավոր է գնել 150 դոլարով:
Պետհամարանիշերը նաև անձեռնմխելի են դարձնում դրանց տերերին` ստիպելով պետավտոտեսուչներին հեռու մնալ նրանցից: Փաստաթղթում նշվում է, որ եթե նույնիսկ ոստիկանը հանկարծ կանգնեցնի 12xx123 պետհամարանիշով մեքենա` կաշառք ստանալու համար, ապա 05 XX 555 պետհամարանիշերով ավտոմեքենաները, որոնք պատկանում են ղարաբաղյան պատերազմի հերոս Մանվել Սարգսյանին, նույն կարգավիճակն ունեն, ինչ դիվանագիտական կարմիր պետհամարանիշերը:
