WikiLeaks կայքում այսօր հրապարակվել է Հայաստանին վերաբերող հերթական փաստաթուղթը, որտեղ անդրադարձ կա «Հոկտեմբերի 27»-ի գործին:
Ամերիկյան գաղտնի նամակագրության մեջ, որը թվագրված է 2003թ. դեկտեմբերով, նշվում է, որ երեք տարվա դատավարությունից հետո դեկտեմբերի 2-ին ՀՀ խորհրդարանում վարչապետին, ԱԺ նախագահին և ևս 6 այլ անձանց գնդակահարած մարդիկ ստացան ցմահ ազատազրկում՝ բացառությամբ մեկի, որը դատապարտվեց 14 տարվա ազատազրկման: Նշվում է, որ, ըստ զոհերի հարազատների՝ Քոչարյանը ղեկավարում էր դատավարության ընթացքը` կանխելու համար իր վարչակազմի վերաբերյալ վարկաբեկող տեղեկությունների վերհանումը: Նման տրամադրություններ են եղել նաև հասարակության մեջ: Քոչարյանն ու նրա դաշնակիցներն այս մեղադրանքները հերքում էին: ԱՄՆ դեսպանատունը երբեք դա ապացուցող տեղեկություններ չի ունեցել:
Նշվում է, որ ընդդիմության առաջնորդները նույնպես մեղադրել են կառավարությանը` մարդասպանների համար մահապատիժ չսահմանելու համար, թեպետ մահապատիժը մինչև դատավարության ավարտը վերացվել էր Հայաստանում` փոխարինվելով ցմահ ազատազրկմամբ: Դա Եվրոպական խորհրդին անդամակցելուց հետո Հայաստանի առաջ դրված նախապայմաններից էր: Այդուհանդերձ, այս համատեքստում բերվում են Ստեփան Դեմիրճյանի խոսքերը, որը նշում է, որ մահապատժի վերացումը վերաբերում է խաղաղ ժամանակաշրջանին, իսկ ահաբեկչությունը խորհրդարանում ոչ այլ ինչ է, քան պատերազմական գործողություն, որի մեղավորներին պետք է մահապատժի ենթարկել: