Այսօր՝ հուլիսի 1-ին՝ ժամը 19:30-ին, ընդդիմադիր «Դիմադրություն» շարժումը Երևանի Ֆրանսիայի հրապարակում հրավիրել էր հանրահավաք:
«Հայկական ժամանակի» ուժային աղբյուրների փոխանցմամբ՝ ժամը 20:10-ի դրությամբ հանրահավաքին մասնակցել է շուրջ 2000-2100 մարդ:
Հանրահավաքին հաջորդել է ընդդիմադիրների երթը, որին մասնակցել է շուրջ 1600-1700 մարդ:
Այսօր առավոտյան ՀՀ Ազգային ժողովը արտահերթ նիստով«Հայաստան» խմբակցության պատգամավոր Իշխան Սաղաթելյանին զրկեց ԱԺ փոխխոսնակի պաշտոնից, իսկ նույն խմբակցության պատգամավոր Վահե Հակոբյանին՝ ԱԺ տնտեսական հարցերի հանձնաժողովի նախագահի պաշտոնից: Այնուհետև ԱԺ «Հայաստան» խմբակցության պատգամավոր, ԱԺ արդեն նախկին փոխնախագահ Իշխան Սաղաթելյանը հայտարարեց, որ ընդդիմությունը խորհրդարանում կհրաժարվի վարչական մյուս պաշտոններից ևս և չի առաջադրի նոր թեկնածուներ թափուր պաշտոններում։
«Քաղաքացիական պայմանագիր» խմբակցության քարտուղար Արթուր Հովհաննիսյանն էլ, լրագրողների հետ զրույցում անդրադառնալով Սաղաթելյանի այս հայտարարությանը, նշել էր՝ նախնական կարող է ասել, որ չեն պատրաստվում այդ պաշտոնները լրացնել:
Օրվա ընթացքում ԱԺ տարածաշրջանային և եվրասիական ինտեգրման հարցերի հանձնաժողովի նախագահի պաշտոնից հրաժարականի դիմում ներկայացրեց ԱԺ «Հայաստան» խմբակցության պատգամավոր Արմեն Գևորգյանը, այնուհետև՝ ՀՀ ԱԺ «Հայաստան» խմբակցության պատգամավոր Թադևոս Ավետիսյանը, Արթուր Խաչատրյանը և «Պատիվ ունեմ» խմբակցության պատգամավոր Հայկ Մամիջանյանը «Ֆեյսբուք»-ի իրենց էջերում ԱԺ հանձնաժողովների փոխնախագահների պաշտոններից հրաժարվելու մասին հայտարարեցին: Վերջիններիս հայտարարությունից քիչ անց Ազգային ժողովի «Պատիվ ունեմ» խմբակցության պատգամավոր Թագուհի Թովմասյանը «Ֆեյսբուք»-ի իր էջում գրեց, որ չի պատրաստվում հրաժարվել ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահի պաշտոնից և իր գործունեությունը շարունակելու է որպես անկախ, անկուսակցական նախագահ:
