Վերլուծաբան Նժդեհ Հովսեփյանը ֆեյսբուքյան իր էջում գրել է. Հայաստանի և Թուրքիայի բանագնացների այսօրվա հանդիպման արդյունքները բավականին տպավորիչ են` նկատի ունենալով դիվանագիտական գործընթացների ավանդական դանդաղության ու հայ-թուրքական հարաբերությունների բարդության հանգամանքները։
Անկախ ցանկացած տեսակի արտաքին շահագրգռվածություններից ու կոնկրետ ազդեցության էմիսարների քարոզից` այս գործընթացը պետք է շարունակվի, և շատ կարևոր է, որ Հայաստանը իր ձեռքից եկող ամեն ինչ անի (զգուշությամբ, հանդարտությամբ ու հաշվարկով)` հանկարծ թույլ չտալու դրա տապալումը։ Հայ-թուրքական հարաբերությունների չկարգավորված վիճակը ձեռնտու է նաև Ադրբեջանին, որն այժմ փորձում է տապալել տարածաշրջանում խաղաղության հաստատման հնարավորությունը` արդեն իր համար ձեռնտու ստատուս-քվո ձեռք բերելու, հայ-ադրբեջանական հակամարտության անվան տակ տարածաշրջանում որոշում կայացնող գործոն դառնալու, Իրանի հետ մրցակցության հավակնություններով խիստ հեռանկարային նպատակների համար։ Դրանից Հայաստանը միանշանակ կորցնելու է` նաև նկատի ունենալով Ադրբեջանի տարածքային հավակնությունները Հայաստանի հանդեպ։ Հետևաբար, Հայաստանի խնդիրը պետք է լինի առավելագույնս նվազեցնել կոնֆրոնտացիայի աստիճանն ու մակարդակը, գտնել modus vivendi` հաղթահարելով Ադրբեջանի` դրան հակասող ցանկությունները։ Այդ հաղթահարման ուղիներից մեկն էլ հենց Թուրքիայի հետ գործընթացը կենդանի պահելն է, հնարավորինս առաջ գնալն է։ Հայաստանը գոյաբանական ռեսուրս չունի Թուրքիայի հետ հակադրությունը շարունակելու, ավելին` առնվազն անդրկովկասյան արիալում այդ հակադրությունը հակառակ է ՀՀ պետական շահերին։
Հայաստանի անվտանգային ճարտարապետության ամենակարևոր հատկանիշը պիտի լինի «հակա»-ների բացառումը` հակաթուրք, հակառուս, հակաարևմտյան, հակակամբոջիական, հականորզելանդական և այլն։ Սա կարևորագույն դոկտրին է, առանց որի, մեր ռեսուրսների պարագայում, մենք` որպես պետություն ու ժողովուրդ, այս միջավայրում նորմալ կենսագործունեության հնարավորություն չենք ունենալու։
