Արցախի նախագահ Արայիկ Հարությունյանը այսօր Արցախի Ազգային ժողովում պատասխանելով պատգամավորներից մեկի հարցադրմանը նշեց. «Կապված երթուղու հետ, մենք ունեցել ենք մի քանի առաջարկություն՝ եւ Ադրբեջանի կողմից, եւ ՌԴ-ի կողմից. բոլոր առաջարկությունները մերժվել են: Գործող մայրուղին, ավելի ճիշտ առաջարկվողը, քննարկվել է մի քանի անգամ՝ Անվտանգության խորհրդում, որին մասնակցել են ԱԺ-ում ներկա բոլոր քաղաքական ուժերը: Մենք ընտրել ենք, ըստ մեզ, լավագույն տարբերակը: Կան գաղտնիքներ, որոնք ես չեմ ուզում այստեղ բարձրաձայնել: Ինչո՞ւ ենք ընտրել այդ տարբերակը՝ հենց հիմք ընդունելով անվտանգային հետագա մեր խնդիրը: Ճանապարհն ավարտվելուց հետո, մենք հնարավորություն ենք ունենալու մեր կարծիքն ասելու՝ որակի առումով համապատասխանո՞ւմ է այն ստանդարտներին, որը մենք ենք ուզում, արդյոք լինելու է անվտանգ, իսկ իմ կարծիքով՝ շատ ավելի անվտանգ է լինելու՝ բազմաթիվ անվտանգային խնդիրներ հաշվի առնելով»:Թեմայի շուրջ «Առաջին լրատվական»-ը զրուցել Արցախի խորհրդարանի արտաքին հարաբերությունների մշտական հանձնաժողովի նախկին նախագահ, քաղաքագետ Վահրամ Աթանեսյանի հետ:
Աթանեսյանի խոսքով՝ նենգափոխություն է, երբ ասում ենք Լաչինի միջանցքն ենք հանձնում․ «Նոր երթուղու հաստատմանը զուգահեռ, Հայաստանի և Արցախի իշխանությունները պետք է ճշգրտեն այդ «միջանցքի» պարամետրերը: Նոյեմբերի 9-ին համաձայնագրով չի ասվում, որ Հայաստանին և Արցախին տրամադրվում է ճանապարհ, այլ տրվում է միջանցք»:
Նշենք, որ Բերձորը շրջանցող Արցախը Հայաստանին կապող նոր ճանապարհի շինարարության հարցը ամրագրված էր 44-oրյա պատերազմի ավարտին կնքված եռակողմ (Հայաստան, Ռւոսաստան, Ադրբեջան) պայմանագրով: