Հունիսի 27-ին ԳԴՀ-ում ՀՀ դեսպան Վիկտոր Ենգիբարյանն այցելեց Համբուրգ: Այս մասին տեղեկանում ենք Ենգիբարյանի ֆեյսբուքյան պաշտոնական էջից։
«Այցը սկսվեց Համբուրգում ՀՀ պատվավոր հյուպատոսությունից, որին հաջորդեց Համբուրգ-Բահրենֆելդի DESY հետազոտական կենտրոն այցելությունը: Այստեղ դեսպանը հանդիպում ունեցավ DESY-ի տնօրեն պրոֆ․ Դոշի հետ։ Ապագայում Հայաստանի հետ ավելի սերտ համագործակցելու պայմանավորվածություն ձեռք բերվեց։ Մասնավորապես, նախատեսվում է ակտիվացնել համագործակցությունն արհեստական բանականության ոլորտում։
DESY-ի հյուրերի գրքում ավանդական գրառում կատարելուց հետո դեսպանն այցելեց Vamenia ապրանքանիշի սրահ, որը հիմնադրվել է հայ դիզայներ Ուսոյանի կողմից:
Այնուհետև դեսպանն այցելեց Համբուրգի քաղաքապետարան։ Դեսպանին ողջունեց պետքարտուղար և լիազոր Ալմուտ Մյոլերը։ Կողմերը քննարկեցին փոխադարձ այցերին և տնտեսական ու մշակութային համագործակցությանն առնչվող հարցեր։ Դեսպանը գոհունակություն հայտնեց կառուցողական զրույցի և Համբուրգի հետ համագործակցության հետագա ընդլայնման առնչությամբ։
Այնուհետ դեսպանը հանդիպում ունեցավ Համբուրգի հայ համայնքի ներկայացուցիչների հետ: Դեսպանը շնորհակալություն հայտնեց համայնքի վարչությանը հատկապես մշակութային հարցերում ակտիվ ներգրավվածության համար»,- հայտնում է Ենգիբարյանը։
